La semana ke pasimos meldimos la perasha de Noah, es muy importante la perasha de Noah, vos kontare deke.
Noah era muy onesto, era piadozo, su kamino era kamino del Dio, ma malorozamente su entorno, afuera de la famiya, la sosyedad estava muy negra, todos empesaron a salir del kamino djusto. I el Dio Baruh-u desido a destruir a todos, solo a Noah kon su famiya le disho ke va aver una inondasyon i por esto ke aga una grande nave i ke meta aryento de todo tipo de beemas dos pares, i komida, i bevienda para bivir. La inondasyon sureo 5 mezes, dospues ke kalmo, kuando se travo la agua, la nave kedo enriva de una montanya i aya kaji kedaron aryento de la nave 5 mezes.
En el total dospues de 10 mezes abasharon de la nave i pizaron a la tyerra, i empeso de muevo a neglijar la umanidad i la vida. Su dever era sostener la vida, todo lo ke es diferente por esto lo metyo aryento de la nave, para ke la vida kontuneye.
Agora deke eskrivi esto todo, malorozamente se parese muncho al mundo de oy, todos estamos en la mizma nave, i el mundo entero salyo del kamino, las gerras, la situasyon, no kedo respekto, la jenerasyon mueva esta muy diferente, la teknolojiya esta misteryoza, i el mas grande problem es la asimilasyon. Parese ke otruna inondasyon de Noah kere el mundo.
La inondasyon de Noah mos da una leson muy grande para los ke keren entender
''Esperansa, kreer, el koraje para empesar de muevo.''
''Toma prekosyon kontra todo para ke tu salvasyon seya fasil.''
Syemre kon alegriya, syempre kon esperansa, syempre kon pas!
