Keridos lektores del Shalom. En pasadas tuve una alegria de pueder arekojer los artikolos ke aviya eskrito en el livro ke se yama Eskoji la Pendola. I agora tengo el plazer de partajar estos artikolos kon vozotros en djudeo-espanyol.
Ah, estas Koleksiones…
Edad 10 — Tengo una koleksion de estampas…
Edad 15 — No kero azer koleksion de nada…
Edad 20 — Guardo los bilyetos de los eventos a los kualos fui kon mis amigos
Edad 30 — Koleksiono las kuklas de los paizes ke vijiti
Edad 40 — Agora esto aziyendo koleksion de piedras naturales…
Edad 50 — Guadro fotografías viejas
Edad 60 — Agora esto aziyendo koleksion de miniaturas de porselena…
Edad 70 — Ay, ande puedo meter todas estas kozas?…
Edad 80 — Los ijos no van a kerer ni mirar estas koleksiones!
Edad 90 — Se esparese mi koleksion… Aviya metido muncho eforso enriva de eyas.
El pensador i sosyologo fransez moderno, Jean Baudrillard dizía: "En las koleksiyones se eskonde una idea de fuyir del mundo”.
Todo objeto ke kon el plazer de ambezar, de ordenar o de gozar, entra en la definision de la palavra koleksion.
A los ke dizen “azer koleksion es karo”, yo les respondo: “No, no te digo de koleksionar otomobiles viejos ma puedes koleksionar las piedras kon formas maraviyozas ke se topan al lado de la mar.”
Una de las mas grandes ganansyas de koleksionar es salir de la rutina i gozar el momento en el ke mos topamos.
Akel objeto chiko ke topamos i munchas vezes merkamos no es una koza ke se eskoje por azardo. Es una referensia a los anyos de muestra kreyatureriya.
Esta pasion ke parese a un djugo, en verdá es un trezoro de la memoria.
En el mundo moderno, es posivle bivir mirando adelante i al mizmo tiempo tener un sistem fundado en el pasado.
Kuando el ombre aze koleksion, no solo sige las valores estetikas. La idea de kompletar es lo ke se pensa lo mas.
Siempre bushka “uno mas”, “uno mijor”.
Amasar es tanbien perfeksionizmo; es el amor por los detayes.
El koleksionador no mira sus kozas komo simples objetos. Se piedre en pensando.
Serra los ojos un momento i pensa: Kontar las istorias de las piesas, esta es muestra responsabilidad.
Ken save, muestros inyetos van a azer koleksiones de viejos telefonos, o otras kozas ke agora ni mos puedemos imajinar.
Kero kreer ke no van a despareser nuestras koleksiones.
Solo ay una koza ke no te konsejo de koleksionar: Los rekuerdos ke no dan savor.
De vez en kuando echalos a las profundinas de la mar. Aze una limpieza de primavera en el alma. Echalos, para ke kede lugar para los ermozos rekuerdos.
