En 1983, Roger Prior, de la Universitad de Belfast topo ke el nombre viejo del violon es “la viola de gamba” ke fue inventada en Espanya, antes de la ekspulsion de los judios. Se puede pensar ke los ekspulsados de Espanya ke pasaron para bivir en Italia, trusheron este instrumento i la viola de gamba se konvertio kon el nombre violon en su muevo paiz.
Durante su investigasion, Roger Prior se refero a la famiya Amati de Cremona. El padre Andrea (1520-1578) dizenyo la forma del violon moderno i su ovra fue kontinuada por sus ijos i fue perfeksyonada por su inyeto, Nicola. Nicola fue maestro de Andrea Guarneri i Antonio Stradivari (1644-1737). Segun Prior, el nombre orijinal de Amati era “Haviv” (en ebreo ) ke fue italianizado de Amado a Amati.
La famiya Amati domino la konstruksyon de instrumentos de kuedras en Cremona durante mas de 100 anyos. Andrea Amati, fue konsiderado komo el padre del violon moderno i sus violones fueron muy adelantados para su tiempo, sovre el punto de vista muzikal i fueron eksportados a diferentes paizes en Evropa.
Nicola Amati i Antonio Stradivari kontinuaron en rafinando i mijorando la konstruksyon del violon. Stradivari fue el “luthier” el mas famozo de todos los tiempos i konsiderado el mijor eksperto en la fabrikasyon de los violones. Sus violones son apresiados por su beyesa estetika, su kualidad eksepsyonal de su tono muzikal i fueron konosidos komo los “Stradivarius” i apresiados asta muestros dias.
El violon se izo un instrumento sentral en la muzika klasika evropea i en el mundo entero. Su profunda ekspresividad ayudo a ser un instrumento popular de alta variedad de jeneros muzikales, desde la muzika klasika asta el jazz, el folk i la muzika popular. En el siglo XVIII, kompozitores komo Bach, Vivaldi i Mozart, en el siglo XIX, Beethoven, Brahms, Tchaikovsky eskrivieron ovras maestras para el violon en eksplorando muevas teknikas de interpretasion.
En el siglo XX, el violon fue una atraksyon para los virtuozos de muzika klasika komo Yehudi Menuhin i Jascha Heifetz i tanbien en el jazz komo el virtuozo Stephane Grapelli.
Este instrumento de kuatro kuedras, kon su dinamizmo i fleksibilidad mos da emosiones profundas porke tiene la kapasidad de produsir una grande variedad de ermozas melodias. Los muzisyenes judios preferaron este instrumento porke pueden ekspresar todo modo de sentimientos akumulados durante nuestra istoria turbulente.
