Ya pasimos las fyestas Rosh Ashana, Kipur, Sukot i Simhat Tora kon una grande alegriya, porke el 13 oktubre lunes, dia de sefer, se produizo un NES del Dyo.
El Prezidente Donald TRUMP i unos kuantos prezidentes sinyaron por la fin de la gerra i por la salvasyon de los vente rehenes.
Este evenemento fue un grande entuzyasmo ke izo yorar al mundo entero de ver en todas las televizyones el momento de renkontro kon las famiyas de las dos partes.
La fyesta de Rosh Ashana sinyifika la Kavesa del Anyo.
Es un dia de balansa spiritual, kuando las personas realizan un egzamen de konsiensya sovre las aksyones del anyo ke se serran, a demandar pardon al Dyo, el Todo Poderozo.
El anyo muevo u Rosh Ashana es el nasimyento de la liberta. El nombre asigun la Torah es Yom Teruah, komemora la kreasyon del ombre.
Durante Rosh Ashana, el puevlo djudyo komemoro el dia en el ke el Dio kreo el mundo. Es dizir, se selebra el dia de la kreasyon del mundo i del ombre.
Komo se selebra: Los kreyentes van a sonar 100 vezes el Shofar ke es un enstrumento liturjiko fabrikado kon el kuerno de un karnero. El sonido de este kuerno, yama a los djudyos a la meditasyon i a tornar al kamino de la djustisya (Teshuva).
Rosh Ashana kon el Yom Kipur endjuntos forman en la tradisyon djudiya una unidad yamada Yamim Noraim, ke kijo dizir dias terribles, por ser el momento en ke Elohim djuzga al mundo i dekreta lo ke suksedera en el anyo muevo.
El primo de Tishri no es solo el primer dia del anyo, sino tambyen su Kavesa. Asi komo la kavesa komanda el resto del puerpo.
En las fyestas no estava en Estambol. Me fui allado de mi ijo, mi ermuera i mi muy kerida inyetizika ke biven en Amsterdam en la Olanda.
La primera noche de Rosh Ashana, la mujer de un amigo de mi ijo mos envito a su kaza. La madre del amigo ke era mi kompanyera de klasa en la eskola franseza, estava aya i gizo todo lo ke kale. Manos Bendichas ke tenga. Todo estava muy savrozo, muy pastozo.
En Rosh Ashana se kome unos alimentos espesyales ke sembolizan bendisyon, komo mansana kon myel, datiles, kalavasa i munchas otras kozas.
Enfin estavamos ocho grandes i sinko kriyaturas. Fue una noche djusto de fyesta.
Estuve dos semanas en Amsterdam, la sivdad me plazyo muncho. Una sivdad muy ermoza formada de kazas de tres u kuatro etajes, komo villas, todas entornadas de rozas multikolores. Munchos parkos yeno de vedruras, arvoles i flores. La sivdad entornada de kanales, i en los kanales barkas yenas kaminando kon los mansevos bevyendo i komyendo.
Mas munchas bisikletas ke arabas. Grandes i chikos kon bisikletas ke tyenen komo unas kazas chikas delantre para las kriyaturas. Kije vijitar la sinagoga portugeza israeli ma las dos vezes ke me fui estava serrada. Lo ke me shoko es ke no aviya dingun simbolo, dinguna eskriturya ni seguridad en la puerta.
Una sinagoga muy grande de afuera, un batimento alto i muevo. Espero vijitarla la proksima vez ke me va ir a Amsterdam, si kere el Dyo.
