Kuando mos fuimos al tur de los Balkanes, kaminimos Makedonya, Albania, Montenegro, Bosnia Hersek i Serbiya. Izimos un tur maraviyozo. En kada paiz i sivdad tomimos keyf grande en kaminando. Todos los lugares no vos puedo kontar, porke no tengo lugar para eskrivir este karar. Vos kontare solo un lugar. El paiz, Bosnia Hersek i la kapital, Sarayevo. Kuando se dize Bosnia, en primero viene al tino el Kyupri de Mostar. Este kyupri se fraguo ensima del rio Neretva. En los anyos 1566 por el arkitekto Hayrettin, ke era elevo del Arkitekto, Sinan. En akeyos anyos komo lo fraguaron, solo de pensar kedimos kuryozos. Los mansevos ke se van a kazar en Bosnia, antes de la boda saltan del kyupri para amostrar ke son korajozos. Agora para tomar paras de los turistos estan saltando i estan azyendo manifestasyones. El kazal entero muy otantiko. Las kayes, las botikas turistikas, los restorantes, los kafes todo kon la vista del rio o del kyupri. En tornando al otobus, vimos unos kuantos borekchis. Ya se save ke los borekes i las kyoftes de los Balkanes son muy pastozos. Tomimos unos kuantos borekes diferentes, mos asentimos en un kafe i los komimos kon chay. Reelmente estavan muy savrozos. De aki vinimos a Sarayevo, la kapital del paiz. Delantre de la biblioteka sentral abashimos. El Gia mos konto la estorya de este bibliotika, i la kaza de enfrente ke se yama İnat Kuca. Aki se yama kaza de la Viktorya del kapricho. Kon el grupo kaminando pasimos del kyupri Latino. De aki vinimos a la sivdad vieja. Empesimos a kaminar el tur panoramiko. Pasimos de Kurşunlu Medresesi, Morica Han, La Meshkita Gazi Hüsrev Bey i la Kula de Ora. En la kaye serrada al trafiko aviya Meshkita, Iglesia i Sinagoga lado kon lado. Komo Ortakoy i Kuzguncuk. Komo eskrivyo la poetesa Beki L. Behar, z"l. CHAN-EZAN-HAZAN. La mas grande Iglesia se topa en la kaye Ferhadija; es una Iglesia Katolika. Al lado se topa el bazar serrado, Markale. Aki se estava vendiendo kozas de karnes, kezos, azetes i espesyas. A la fin de la kaye aviya por la memorya de la sigunda gerra mondial el Monumento de Lumbre ke no se amata. Despues ke eskapimos el tur panoramiko este karar mos plazyo los borekes ke komimos en Mostar, ontruna vez; mos asentimos en un borekchi, komimos borek i al lado mos metyeron yogurt.
Si vinimos al kavzo de la eskriturya ke es las supas del mundo ke komimos vos kontare. Las kayes de Bosnia es komo las kayes de Adana. En kada kaye aviya 4 o 5 koftechis i borekchis. En estos restorantes tambiyen aviya supas. Un amigo le travo la alma i demando al garson ke supa es spesyal de Bosniya. Le disho Bey Chorbası, i le trusho. Mos konto ke esta supa se aze en las bodas, i en las fyestas. Aryento de la supa aviya gayna, patatas, karotas, bamyas, ojas de apyo, prishil. En buyendo se echa la krema i ansi se aze el servisyo.
