El mez de Oktubre es yeno de fyestas ma de otra parte es yeno de gerras i ojas pretas en la istorya djudia. Entre estos evenimyentos se topa uno: Los Djuzgos de Nuremberg.
El 18 de Oktubre de 1945, empeso la sesyon inogural de los prosesos de Nuremberg (tambyen konosidos komo el Tribunal Militar Internasyonal) kon el eskopo de yevar delantre la djustisya a los kriminales de gerra Nazis. Fueron una seriya de 13 djuzgos en Nuremberg, Alemanya. Los enterasados fueron akuzados por kulpas kontra la paz i kulpas kontra la umanidad.
Aunke se topo kontroversiyal en su tyempo, los Djuzgos de Nuremberg se konsideran oy komo un primer paso en el establesimyento de un tribunal internasyonal permanente i un presedente importante para abordar kavzos posteriores de jenosidyo i otras kulpas kontra la umanidad.
Kaji un anyo despues, el 1 de Oktubre de 1946, se meldo la sentensya: 12 de los akuzados fueron kondanados a la muerte (a ser enforkados), 3 a la prizyon perpetual, 4 a penas de prizyon de entre 10 i 20 anyos i 3 fueron liberados. De los 24 akuzados orijinales, uno, Robert Ley, se suisido en la prizyon, i un otro, Gustav Krupp von Bohlen und Halbach, fue deklarado mentalmente i fizikamente inkompetente para ser djuzgado.
El 16 de Oktubre se egzekutaron las sentensiyas de muerte. Las egzekusyones tuvyeron lugar en el jimnasio del tribunal. Diez de los kreatores de la ideolojiya i de la politika nazi fueron enforkados: Hans Frank, Wilhelm Frick, ministro del Interior; Alfred Jodl, shef del Estado Mayor de Operasyones de las Fuersas Armadas; Ernst Kaltenbrunner, shef de la Polisiya de Seguridad; Wilhelm Keitel, segundo shef de las Fuerzas Armadas; Joachim von Ribbentrop, ministro de Relasyones Exteriores del Reich; Alfred Rosenberg, ministro del Reich para la Area Oriental Okupada; Fritz Sauckel, Arthur Seyss-Inquart, ministro del Interior, i Julius Streicher, el ideologo de antisemizmo del Reich i el direktor del jurnal Der Sturmer.
Hermann Goering, lider de la Gestapo i de la Luftwaffe, fue kondenado a la muerte, ma se suisido el 15 de Oktubre de 1946 (tres oras antes de ser egzekutado).
