Keridos lektores,
Entrimos a un anyo muevo, demandimos pardon, komimos en la suka, baylimos kon la Tora, mos gustimos kon la pas. Seyamos eskritos en livros de vidas largas kon sanedad, kon alegria i atslaha. Agora oyeremos los konsejos de una madre kontada por su ijo.
Mi madre syempre kansada, syempre iritada, syempre sin durmir i inyervoza de sorte, siempre estava hazina.
Una demanyana en dezayunando todo troko.
Mi padre en bevyendo el chay, le disho a mi madre:
“Esto muy inyervozo; ay mezes ke esto bushkando echo i no esto topando; oy va salir a kaminar kon los amigos.”
Asperando ke va echar gritos i se va travar los kaveyos, mi madre le disho:
“Bueno pasha va toma un poko de aver.”
Mi ermano le disho;
“Mama en este periodo de la universita de todas las lisyones kedi.”
“No es problem kerido, meldas otrun anyo, solo de agora endelantre vas a pagar tu, los gastes de la universita.”
Mi ermanika tomo la palavra i le disho:
“Mama ize un aksidente kon la araba.”
“Pasado ke te seya hanum, te vas a la eskola kon metro; yevala al servis i pagale los gastes kon la semanada ke te da el papa”.
Todos kedimos enkantados de ver esta reaksyon de mi madre, porke otro tyempo, gritava, yorava, se travava los kaveyos. Pensimos ke tomo una kura nombrada: “NO ME IMPORTA”.
Entonses mos yamo a su entorno i mos disho:
“Keridos, kada persona es responsavle de su vida, para entender esto, me tomo anyos. Mi ansyedad, mi depresyon, mis penseryos no estavan reglando vuestros problemes, a la kontra estava pujando los miyos. Yo no so responsavle de vuestros problemes, azervos feliz no es mi dover. En los kursos ke me fui, komo yoga, meditasyon etc. me ambezi a estar kalma i kontrolar mis sentimyentos. Kada uno es responsavle de sus problemes. Mi dover es, kerervos byen, darvos koraje i bendizirvos. Topar solusyon i ser feliz es vuestra responsabilidad. Si keresh ideas vos do ama azerlas es vuestro dover. Todas las desizyones – buenas u malas, la responsabilita esta en vozotros. De agora endelantre yo no so:
- El kuvo de syerkol de vuestras responsabilidades
- Yo no so el portero de vuestras kulpas
- No so la lavandera de vuestra konsensya
- No so avokata de vuestras kulpas
- No so la pared de vuestras keshas
- No so la gardiana de las lisyones ke no parvenitesh
De oy endelantre esto deklarando ke sosh libres i independentes.
Todos kedimos enkantados ma no topimos palavras para darle repuesta. De akea ora endelantre entendimos ke ya mos engrandesimos mezmo ke mos vino muy afuerte de tomar responsabilita porke estavamos auzados a echar todo lo negatif enriva de mi madre.
Oy mezmo ke no esta en vida, sus palavras de alkavo no me se van de los oyidos.
“NO NASIMOS PARA SER TODO PARA TODOS; DESHA DE TOMAR LA KARGA DE TODOS”.
