Kuando me iva a Paris por las Ferias me kedava uno o dos diyas mas. I me iva a Bruksel o a Amsterdam. En viyajando a un sivdad azer este modo de eskapades a otros sivdades me plaze. Un diya kuando estava en Paris me desidi de irme a Bruksel. Me fui a la Gare du Nord ke es la estasyon de los trenos en Paris, tomi bilyeto para Bruksel en 1 ora 25 minutos kon el treno THALYS a la otra demanyana a las 9 me fui a Bruksel. Arivimos a las 10.25 al Gare de Sud. De aki me fui kon el tramvay a la estasyon Bourse. Delantre del Boulvard Anspach en kaminando vine a la Iglesiya St. Nikolas. Kamini un poko aryento de la Iglesiya. Las vitrayes estavan komo un arkansiel. De aki en kaminando en 10 minutos vine a la plasa Grand Platz. Una plasa ke es de ver. El edifisyo de la Munisipalidad i los edifisyos de esta plasa estavan muy tipikos de esta jeografiya. En esta plasa se aze el Festival de las rozas. La plasa entera se dekora kon rozas i en basho entero se aze komo un tablo. Porke teniya poko tiempo kije salir i azer el tur kon “Sightseeing Tours-City Tours”. Por esto en primero me fui a un “Tourist Information”, ize rezervasyon para azer el tur. El tur era a las 2 i fin akel tiempo me asenti en un restorante serka de la Grand Platz. Komi unas kozas i pasi el tiempo. Al tur empesimos en kaminado. Empeso del Grand Platz, de aki vinimos al monumento ke es el sembol de Bruksel, “Maneken Pis” despues suvimos al otobus i mos yevaron a Atomyum. Es un monumento ke izyeron por el ferya EXPO. En el tur panoramiko pasimos del palasyo del rey, de la kaza i paviyon de los Chinos i de los Japonezes, pasimos de la Sinagoga ke se yama Great Synagogue. Las dantelas son muy famozas en el mundo entero; mos yevaron ande se produse las dantelas. Kaji sureyo 2 oras el tur. Despues del tur vine al pasaj ke se yama Galeri Royales St Hubert. Aki me asenti i komi una kup en el kafe Godiva. Las Shokolas de Beljika son muy savrozas. La marka Leonidas es la mas ermoza i famoza en el mundo entero.
Si vinimos al kavzo de la eskriturya ande vos konto las supas del mundo: kuando me asenti al kafe en frente aviya un restorante kon los manteles blankos muy shik, las personas estavan komyendo i bevyendo. Vide muncha djente ke estavan bevyendo supa de aryento de una kaldera. Le demandi al garson i me disho ke es spesyal de Beljika i se yama Moules Marinieres. I me konto komo se apareja. En primero se lavan i se alimpyan las midyas. Por aki aryento de una kaldera grande se mete sevoya i ajo i se sofriye. Despues se mete aryento la sal i la pimyenta, ensima se echa vino blanko, krema i buen karar de agua. En fin se mete aryento de la kaldera las midyas. Kuando se avren las midyas es ke ya se kozyeron. Ensima kon prishil molida se aze el servisyo.
