Mis paryentes meldavan muncho. En kaza teniyamos una biblioteka yena de livros famozos. Eran abonados a la biblioteka del Konsulato fransez i aparte merkavan munchos livros kada vez ke se ivan a la librerie Hachette. Tanbien merkavan munchas revistas komo Paris Match i mas. Kuando eramos chikas mos kontavan lo ke meldavan ma despues ampesimos a meldar mozotros.
En unos kuantos de estos livros o revistas aviya meldado sovre “La cour des miracles” = El kortijo de los mirakolos, i me aviya tanto enteresado ke asta agora no me lo olvidi.
En el tiempo de Lous XIV, en los lagumes de debasho de Paris, moravan unas personas muy danjerozas i ande ni los polises puediyan entrar. El mas konosido era serka de “Les Halles”. Puedemos meldar tanbien sovre estas personas en los livros de Victor Hugo o Alexandre Dumas. Los diyas eran siegos, koshos, sin pachas, vistidos hastroneados, de espantar a ver; ma kuando tornavan a sus lugares, todos se aziyan sanos i rezyos. Komo ke si fuera un miraklo. Por esto yamavan a este lugar “El kortijo de los miraklos”. Este lugar estava apartado por los berbantes. Unos eran responsavles de los sedakeros, otros eran responsavles de los ladrones i otros eran responsavles de las prostitutas. Entre el diya saliyan estos todos a las kayes, aziyan sus echos i a la noche tornavan a sus nidos i davan todas las paras ke ganavan a sus “patrones”. Akel tiempo tanbien se arovavan i a las kriyaturas ke topavan i las aziyan ke demanden sedaka. Estos patrones no teniyan piyadad, tanto ke en vezes mahsus les rompiyan la pacha o el braso de estas kriyaturas para ke ganen mas muncho. Quasimodo, el “Korkovado de Notre Dame” tanbien se kedava aya.
Los reyes i los governadores de Paris intentaron de alimpyar este lugar ma no reusheron. Eran komo una tribu. Teniyan sus leyes, sus linguas spesyalas i teniyan tanbien sus lideres. A la fin del siglo XVII, el rey Louis XIV i su primer ministro Colbert, sin espantarsen izieron una limpieza totala. Derrokaron toda la maalle i fraguaron kalejas enderechadas. Este lugar es agora un kartiye de komerso i restorantes, kon kayes mas modernas, despues de las transformasyones del siglo XIX por el arkitekto Haussmann. Tanbien el famozo kartiye de vistimientas en groso “Rue d’Aboukir” se topa aya.
