En 1888 se avia konstruido el treno Orient Expres, entre Paris i Estanbol. En Estanbol no avia un otel de alto standart para estos pasajeros ke kerian venir a la sivdad. Asi empeso la istoria del otel Pera Palas. Un arkitekto franko-turko, Alexander Vallaurey dezenyo el otel i en el anyo 1892 empeso su konstruksyon. El nombre Pera, ke sinyifika “al otro lado” en grego, fue desinyado porke era en frente de la sivdad sentral, el viejo Estanbol.
En 1895, el otel avrio sus puertas kon un grande balo i kon la asistensia de personajes importantes. Komo se konstruyo en el tiempo del Imperio Otomano, fue echo kon standardes evropeos i fue el primer edifisio ke tuvo asansor elektriko i agua kayente, despues de los palasios de los Sultanes. Desde su inogurasion, el otel resivio miles de pasajeros del mundo entero: famozos artistos, eskrivanos, produktores, politikos i aristokrates.
A parte su somptuozo edifisio, el otel, Pera Palas fue un sentro importante, komo si todas las ideas del mundo estavan saliendo de aya. Durante las gerras mundial, fue una baza internasional, onde se azia diskusiones politikas, i komo era el lugar de pasaje de los espiones, munchas stratejias i momentos desizivos fueron kreados en estos enkontros.
Pera Palas fue el lugar preferido del fondador de la Turkiya moderna. Mustafa Kemal Atatürk tenia su kamareta, No.101, onde resiviya sus invitados i munchas desiziones importantes eran tomadas en este kuarto somptuozo. Para el nasimiento de 100 anyos de Atatürk, el No.101 se konvertio en muzeo i se avio a las vijitas turistikas.
La kamareta No. 411 fue dedikada a Agatha Christie porke eskrivio su romanso “Asasinato en el Orient Express”. Esto sigura ke si kada kamareta tenia una boka, mos iva kontar munchas obsevasyones istorikas, munchas aventuras romantikas.
