Azyendemos viejos ay munchas kozas ke mos parese kompletamante inutil o sin emportansya. Antes de todo, no damos la valor ke davamos kuando eramos mas mansevos a la opinyon de otras personas sovre muestro komportamyento, sovre la vestimyenta, sovre muestra manera de djuzgar. A muestra edad de oy, pensamos ke no vale la pena de kansarse para empresyonar tal komo lo aziyamos en muestra manseves. Esta liberasyon de ansyas deve ser uno de los regalos ke mos ofrese muestra edad.
Kozas ke mos aziyan inyervar komo kondusyendo esperar por modo del trafiko, komo la kritika del vizino, no mos parese tan emportante en la vyejes tal komo mos paresiya en la manseves. No dando emportansya a kozas ke oy mos paresen inutil, mos aze muncho mas savyos.
Una koza ke es syerto, es ke sin darmos kuenta, estamos trokando kon los anyos. Trokan las valores ke davamos, trokan los rekuerdos, trokan los esfuenyos, trokan las ambisyones.
Mas mos envyejesemos, mas mos konosemos a mozotros mizmo. Savemos mijor lo ke keremos, lo ke puedemos ofreser, lo ke mos puede desgustar. Kon el tyempo mos damos kuenta ke la reushita pyerde su emportansya. En la manseves, tener una araba, tener una kaza en un apartamento de una maale prestijyoza, tener vistimyentas de marka, mos paresiyan ke eran las yaves de ser orozos.
En la vyejes lo ke konta son los momentos ke bivimos, ke dizimos un largo “oooh”, apresiyando las relasyones umanas. Lo ke konta es la salud. Lo ke konta es fuyir de la soledad. Lo ke konta es ke konosemos el friyo para apresyar la kalor, konosemos el oskuro para apresiyar la luz. Lo ke konta es ke mos kedo poko tyempo i ke no devemos de perderlo.
Mozotros ke semos nasidos en los 30s 40s… tenemos la shans de konoser 2 millenarios, 2 siglos, vida sin telefon. Asperimos dyez anyos para ke venga muestra sira de meter un telefon en kaza, i vida kon telefon de aldikera ke mos kaye gota si afita alguna koza a este kutiko ande se topa toda la istorya de muestra egzistensya; vida kon radyo ande asperavamos la fin de la istorya ke aviya empesado diyas antes, savyendo ke esta fin devriya de vinir despues de unos diyas; i vida kon televizyon preto i blanko, kon lamba i kon una tripa de prenyada, i la televizyon kon una delgades komo una oja de papel. Agora ya entro a muestra vida i la entelijensya artifisyal ke mos esta tratando kon una etika de una persona mas ke umana kon onor i kon kavod. En poko tyempo no se si vamos a kedar lo ke semos. Bivir i ver.
Septiembre 2025
