Todos ya eskrivieron ke eskapo el enverano. Yo vos va eskrivir sovre el empesijo del otonyo. Eskapar esta un poko triste ma ampesar viene mas sempatik al oyido.
El otonyo es un tiempo de transformasyones. La luz i el sol ampesan a ser mas delikados, el ayre se aze mas fresko i lo mas ermozo es ke los arvoles se visten de kolores rikas. Kolorado, oranj, amariyo i kafe. Este trokamiento de kolores no es solo un spektakulo para los ojos, sino tanbien mos akodra ke la natura esta en movimiento sin kedar.
En munchas kulturas, el otonyo es la epoka de vender, de arekojer los frutos de la tierra i de dar grasias para lo ke mos ofresyo la natura. Los merkados se inchen de uvas, mansanas, bimbriyos, kalavasas koloradas i muezes.
El empesijo del otonyo es la meskla de nostaljiya i esperansa. Nostaljiya, porke los diyas se akurtan, la luz del sol se amingua, i se eskurese mas presto. Esperansa, porke mos apareja para los diyas yelados, para los friyos ke ampesamos a estar mas muncho en kaza, arekojidos kon la famiya i sintimos la kalor de muestros serkanos.
Otonyo no es solo una estasyon del anyo, es una leson de vida. Mos amostra ke kada fin traye un empesijo, ke kada oja ke kaye de los arvoles es una promesa de renasimyento.
En esta sezon se aze aparejos para el invyerno. Se aze dulses, salsas, trushis, makarones, konservas, alitreas i otras kozas para konservar los frutos o las legumbres del enverano. Agora en muestro tiempo es verdad ke ya se merka todo pronto ma yene lo ke es echo de kaza tiene otra savor. No tiene dinguna kura prezervativa. Se kitan las vistimientas de invyerno, se meten al aver para aerearlos. En los kazales ke se kayentan kon sobas, se apareja las lenyas o los kimures.
Aparte de esto el otonyo me plaze muncho porke tenemos munchas fiestas ermozas en esta sezon. I tanbien i yo nasi en otonyo.
Se aparejan las kolchas i los tapetes ke estan guadradas por enverano. Meldi una poeziya sovre el otonyo ke aki la meti:
Otonyo ya yego
El ayre se esfriya
Los arvoles se visten
De kolores de alegriya
En kuzinas se aze
Marmelada i dulsor
Kalavasa, bimbriyo
Kon savor i kon golor.
Otonyo nos ambeza
Kon su boz serena
Ke kada fin del diya
Traye un empesijo sin pena.
Invyernada alegre kon sanedad i pas, es lo ke auguro al mundo entero.
