Los “Yamim Noraim” aserkandosen, kije eskrivir sovre una orasyon muy importante en estos dias.
Dinguna orasyon apanya tan enteramente la relasyon dual del puevlo Djudio kon Ashem komo Avinu Malkeinu, “Muestro Padre, Muestro Rey”. Si bien Avinu Malkeinu es una orasyon konosida por formar parte de la liturjiya de Rosh Ashana, tambyen se melda en kada diya durante Aseret Y’may Teshuva, los Dyez Dias de Arrepentimyento entre Rosh Ashana i Yom Kipur, i en los dias de ayuno.
La formulasyon egzakta de esta orasyon se baza en una orasyon ke Rabi Akiva (c. 50–c. 135 d. C.), uno de los grandes savyos talmudikos, resito durante una sekura. Despues de ke las orasyones de la komunidad no reusheron a enderechar la situasyon, Rabi Akiva se alevanto i empeso a arrogar a Ashem: «Padre Muestro, Rey Muestro, no tenemos otro rey ke Tu. Padre Muestro, Rey Muestro, tengas piyadad de Mozotros!». Imedyatamente, empeso la luvya…
La orasyon de Avinu Malkeinu se kompoza de 44 versos, i el mas konosido i famozo de estos es: “Padre muestro, Rey muestro, ten piyadad de mozotros i respondemos, aunke no tengamos ovras valorozas, komportate kon mozotros kon djustisya i buendad i salvamos”.
Adresando Ashem komo “Padre muestro” i “Rey muestro”, dirijimos muestras orasyones en dos kaminos diferentes. De un padre, esperamos miserikordiya, amor i pardon. Un padre mira a su ijo o a su ija i solo ve a este ijo / ija, a esta persona spesyal, i instintiktamente syente miserikordiya por el o eya, un ijo, ija de su propyo sangre. Por esto, en el Dia del Djuzgo, keremos dirijir muestras petisyones partikularmente al aspekto paternal de la miserikordiya de Ashem.
De otra parte, un rey kontrola el destino de sus suditos. Governa kon djuzgo i djustisya. Por lo tanto, tambyen devemos dirijir muestras orasyones a este aspekto de Ashem en Rosh Ashana i durante los días sigientes (asta Yom Kipur inkluido). Despues de todo, este es el tyempo en el kual Ashem se asenta kon Sus Livros de Djuzgo avyertos delantre de El. Kuando referamos a Ashem komo Muestro Rey, pensando ke, si bien El mos ama komo un Padre, tambyen devemos admirar Su grandeza i majestad.
Vos sueto Shana Tova u Metuka i Hatima Tova, un anyo muevo de paz i amor en el mundo entero…
