En vezes las lesones valorozas salen por aryento de no parvenir, i mos amostran el kamino para parvenir. Todos tenemos muestros malos momentos, la vida mos ambeza de munchas maneras las lesones ke nesesitamos para ambezar, ma en vezes no son muy fasil. I mos demandamos porke yo, u porke agora, ma la djusta pregunta es, komo puedo parvenir? No se enfasyaron de no parvenir, kreyeron asta la fin i ganaron.
Estas istoryas son las istoryas de akeyos ke tyenen muncha pasensya, i nunka no se esvachean de sus kaminos.
1- ALBERT EINSTEIN troko el kamino del mundo sientifiko kon kaji todo lo ke disho durante sus 76 anyos de vida, ma no pudo avlar asta los 4 anyos. Ansi es egzaktamente komo empeso la istorya de la karyera de Einstein. Inkluzo en la eskola uno de sus profesoras le disho ke ''no puedes parvenir nada en la vida''! Entro a ocho egzamenes ofisiales diferentes antes de kumplir 16 anyos, ma no reusho. La ultima vez, tuvo mazal en el egzamen de la Politeknik Federal de Zurih, ma la fin fue lo mizmo. Einstein nunka mas no gano un egzamen. No oyo a dingunos ke disheron, tu no puedes azer nada. El kijo i kreyo i en 1921 gano el Premio Nobel de Fizika i dyo a konoser su nombre al mundo komo un Jenio de la Fizika i Matematikas.
2- ABRAHAM LINCOLN es konosido komo uno de los prezidentes mas emblematikos de los Estados Unidos. Lo ke no savesh, es ke este ombre bivyo una vida sin dinguna reushita antes de azerse prezidente Amerikano. Su vida komersante fue muy mala entre 1830 i 1832. En 1832, a la edad de 23 anyos entro a su karyera de politika kon una kampanya fayitada komo miembro del Partido Liberal de Illinois.
Kon pasensya abraso la vida i empeso a meldar el livro ''Commentaries on the Laws of England'' i empeso a ensenyar derecho. Durante estos anyos se izo un grande avokato i en 1847 entro a la Kamara de Reprezentantes de los Estados Unidos.
Fue el prezidente de los Estados Unidos entre 1861 i 1865, durante sus kuatro anyos de prezidensya lo eskapo el esklavaje, i reusho a modernizar la ekonomiya. Konosido komo el prezidente importante de la istorya.
3- THOMAS ALVA EDISON a la edad de 7 anyos se fue kon su famiya a Port Huron, Mishigan. Eran 7 ermanos i el mas chiko era el. I empeso a la eskola primera, ma unos kuatro mezes dospues fue ovligado de deshar la eskola porke teniya problem de persepsyon. Kuando era chiko, no solo tuvo komentaryos negativos de profesoras ke diziyan ke era tonto, en mizmo tyempo munchas vezes lo suspendyeron del lavoro por ser inefikas. Ma paso a la istorya komo grande inventor por inventar el ampul.
PARA PARVENIR A SUVIR LAS ESKALERAS KALE SUVIR AVAGAR AVAGAR KON PASENSYA.
