Dospues de un enverano byen kayente, finalmente ya esto en mi kaza de invyerno. Kuando se avren las eskolas i empesan a akurtar los diyas, me vyene una oskuridad, empeso a dezear mi kantoniko.
Agora vos esto eskrivyendo de mi kantoniko; vos oguro una anyada buena kon sanedad, kon pas en el paiz i en el mundo. AMEN.
Esta vida reel la meldi en un sitio ande uzo meldar syertos artikolos. Me empresyono muncho. Kontada de su boka mezmo.
“Yo me yamo Amarachi, so guerfana, nunka konosi padre i madre. A mi me engrandesyo mi tiya, ermana de mi padre. Ma komo dize el proverbo, “la karne del benadam es pezgada”.
Kuando vine a los 15 anyos, mi tiya me mando a una kaza en otra sivdad komo servidera. La balabaya de kaza era muy kruela i no teniya piadad. Yo me durmiya en la kuzina, las noches del friyo titireyava. Demanyana me alevantava a las simko de la madrugada, espondjava, fregava i lavava fin ke saliyan los kueros de las manos. Kuando viniyan envitados, demandavan “ken es esta ija”? La repuesta de la balabaya era, “eya es una mosa, no le des kara”.
Estas palavras me tokavan al korason i yorava sekretamente. De mi para mi diziya, "un diya i yo va kaminar kon la kavesa alta”.
Asentar en el salon para mi era defendido. Komiya dospues ke todos eskapavan de komer i a mi me kedava los restos ke se ivan a echar al syerkol.
Un diya, tanto me se yelaron los pyezes me visti las pantuflas de la ija, me aferro i me empeso a aharvar en ensultando, “komo te atrives a vistir las pantuflas de mi ija? Tu sos una mosa”.
Akea noche no durmi fin demanyana i me prometi, “esta dolor me va enforteser”
Kuando eskapava mi echo, me iva al syerkol, bushkava gazetas i livros, los arekojiya, las noches meldava los haberes. Un diya desidi de kontinuar a la eskola. Kuando se lo dishe a mi patrona, yene me aharvo i me disho,
“Ande se vido? Mosa se va a la eskola? Tu lugar es abasho en el mupak”.
Kuando vine a los 18 anyos mas no pude resistir i me fuyi.
Noche i diya bushki echo. A la fin topi un echo en un otel por servidera. Todo lo ke ganava lo avansava, komiya poko solo para no murir. Me eskrivi a los kursos de denoche, peni i lazdri, a la fin parvine i entri a la universita. Munchas elevas se estavan leshos de mi, porke mis vestimyentas eran vyejas ma yo no di emportansa. Los diyas lavorava las noches meldava. A los 25 anyos eskapi la universita kon premio de onor i topi un echo en una banka komo egzekutiva.
Dos anyos dospues, me rankontri kon un ombre ke me amava de korason. Mos espozimos.
La boda ande se izo?
La boda se izo en el otel ke entri por servidera i alimpyava las tualetes. Kuando entri kon el fostan de novya i la kavesa alta, oyi las palmas en vertyendo lagrimas. Entre los envitados estava la damma ande lavorava. Se aserko, me felisito i me demando pardon: “Anarachi! Perdoname!
Le respondi kon una sonriza, “Ke el Dyo te pardone, tu krueldad me dyo la fuersa de bivir”.
La lisyon de esta istorya reel:
Nunka no pyedras la esperansa.
SHANA TOVA U METUKA
