Un padre, ke kedo bivdo muy mansevo, dediko su vida a su uniko ijo. Un dia, ke desho su ijo en kaza i salyo a lavorar, unos bandidos invadieron el kazal, kemaron todas las kazas i fuyeron su ijo chiko. Kuando torno a kaza, el padre enkontro un monton de ruinas i bushko dezesperamente a su ijo. Kuando topo el puerpo karbonizado de una kreatura en el kazal aumado, lo konfundio kon los restos de su ijo. Aparejo un funeray, kemo el puerpo kompletamente, arekojo las sinizas i las incho a una bolsa. Enkolgo la bolsa al ombro i mas no se la kito.
Empeso a yevarse la bolsa kon las sinizas a todos los lugares ke se estava indo. Por tanto, su ijo estava en vida, aviya reushido a fuirse de los bandidos. Kamino dias enteros finke arivo al kazal. Una noche, vino a la puerta de la mueva kaza ke su padre aviya konstruido en el lugar de la ke se aviya derrokado. El padre demando «Ken es?» «So yo, tu ijo. Avre la puerta, padre!» El malorozo padre, ke siempre guadrava las sinizas de la kreatura ke kreia ke es su ijo, penso ke uno se esta burlando de el. «Afuera!», grito el ombre. La kreatura sono a la puerta sin kedar, arogando a su padre ke avra i ke avle kon el. Ma siempre resivio la mizma respuesta: «Afuera!» El ijo, perdio la esperansa, a la fin se fue para no vinir otra vez.
“Si te aferras a una idea komo si fuera la verdad absoluta, kuando la verdad mizma viene a tu puerta, ya no puedes avrirla i enfrentarte kon la realidad”. Esta istoria rezume uno de los prensipios de los mas temeles de la filozofia budista: evitar el absolutizmo.
El padre en la istoria se aferra kon tanta fuerza a la idea absoluta ke su ijo se murio, ke la realidad, por el, es las sinizas ke se esta yevando a todos los lugares. Esta istoria es un trajiko egzemplo de komo las personas pueden azersen esklavas de sus kreensias, supozisiones o ideas fiksas.
Las lisyones ke mos esta dando esta istoria son de grande emportansa no solo en un konteksto relijiozo o filozofiko, ma tambien en muestra vida de kada dia: Las ideas ke puedemos tener, a las vezes, pueden konvertirsen a barieras en evaluando las personas o las situasiones. Una idea negativa ke tenemos sovre alguna persona puede detenermos de ver ke esta persona es una persona buena.
Tambien las personas no keren interojar sus kreensias. Kuando mos konfrontamos kon mueva enformasion o kon situasiones inesperadas, no keremos trokar muestra kreensia.
Aparte de esto, los evenimientos pueden tener munchas interpretasiones, munchas kozas para una situasion. Kuando mos limitamos a una sola idea, puedemos fuir los otros aspektos de la realidad.
Esta istoria mos esta amostrando la emportansa de la fleksibilidad i de la mentalidad avierta. La verdad puede ser diferente de lo ke kreemos. Devemos tener el koraje de enterojar muestra kreensia i ansi puedemos topar la verdad.
