Kuando mos fuimos a San Francisco era Hanuka. Kuando abashimos del aviyon en el aeropuerto aviya una Hanukiya kodja pedaso. Mos gustimos de ver i mos travimos fotos delantre de la Hanukiya. Del aeropuerto vinimos al otel Hilton San Francisco. Komo deshimos las validjas en la kamareta, salimos a las kayes. La mas grande plasa es Union Square. Empesimos a kaminar de esta plasa. No aviya dingunos en las kayes porke era noche de Noel. La djente estava en kaza selebrando el Noel endjuntos kon sus famiyas. No estava avyerto ni botikas ni restorantes. Por esto tornimos al otel. A la demanyana salimos al tur panoramiko de San Francisco kon el giya. En primero mos yevo a un kashko de ande se estava viendo todo San Francisco komo kartpostal, el ponte Golden Gate, las izlas Alkatraz i Sausolito i de aki mos trusho a Fisherman ande se topa la eskala Pier 39 ande ay restoranes i botikas muy aktivas. Aki komimos pishkados asados, fritos i abafados. Gostimos de todo. Estava la savor koza de komer i los dedos. De aki ivamos ir a Union Square, por esto dishimos mos iremos kon Cable Car. Ke son muy nombradas las suvidas i los tramvayes de aki. En asperando ke venga muestro torno aviya un showman ke estava azyendo demonstrasyon a los ke estan asperando en la sira. De aki vinimos a una guerta ke se yama Yerba Buena. Una guerta muy grande. Aryento aviya un peyzaj muy ermozo. Pisinas kon fiskiyes, kafes i restorantes. Aviya un restorante Japonez, i entrimos i komimos Sushi. El servisyo estava muy enteresante. Todo modo de Sushi estava en medyo i mozotros estavamos asentados en el bodre de la meza i estava vinyendo delantre de mozos kon una banda kaminando. A la noche en kaminando entrimos a la maale de los Chinos. Di ke estavamos en Shangay. Las botikas, los restorantes, los templos mizmo komo las sivdades Chinas. Serka de aki vimos restorantes kasheres. Entrimos, estava yeno i komimos Kebap en San Fransisco. El nombre i el adreso es ansina. Sabra Gril Restaurant 419 Ave. Tel. (415) 982-3656 Ay unos kuantos Kasher restorantes mas. 0201Shirat Ha Yam 420 Geary St. Tel. (415)776-2683 tambiyen unos kuantos marketes. Tel Aviv Strictly Kosher Market 2495 Irving Street
Al otro diya desidimos de ir a la izla Saulosito. Tomimos vapor para ir de Pier 39. Pasimos delantre de la izla Alkatras, ke antes era prezyon. Agora es komo muzeo. Se puede kaminar. Despues de una ora arivimos a la izla de Sausolito. Muy ermoza i sempatika. Las villas yenas de rozas i de arvoles. Pasimos el tiempo en kaminando i viendo las kazas. En tornando de la izla, mos fuimos a un restorante de Pizza. El nombre ke se save en el mundo entero, Pizza California.
Si vinimos al kavzo de la eskriturya ke es las supas del mundo en komyendo en la eskala Pier 39, la djente al lado de la meza muestra komyeron una supa de peshkado, ke vino aryento de un pan komo chini. Aryento aviya mas muncho de peshkado produktos de mar. Kreyevos si komesh esta supa kon el pan no puedesh komer mas otra koza. No vos va kontar la resefta de la supa. Es komo savemos supa de peshkado klasiko. Lo entresante es el pan ondo komo chini ke trusheron.
