Kuando mos fuimos a las izlas de Caribes kon Kruzero kaminimos 3 izlas. Las Bahamas, St Thomas i St. Martin. Kada izla estava muy ermoza i enteresante. En primero mos fuimos a la kapital de la izla de Bahamas, Nassau. Empesimos el tur de Queen’s Staircase. Estas 66 eskaleras lo fraguaron en la onor de la Reyna Viktorya. De aki vinimos al otel de 7 estreyas, Atlantis Paradise Island Hotel. De aki mos yevaron a la Fabrika ande se aze el beveraje spesyal de los Caribes, el Rom. En el kamino vimos ke aviya el orno de Kek ande se estava azyendo todo modo de kekes kon Rom. Gostimos i merkimos para trayer a Estanbol. De aki vinimos a Fish Market. Vimos restorantes de peshkados i todo modo de produktos de mar de los Caribes. El mas enteresante era la Concha.
La sigunda izla ande mos fuimos era St. Thomas, la kapital, Charlot Amalie. Empesimos al tur de Black Beard Castle. Esta muraya se topa en el kashko de Government Hill. En entrando aviya un monumento de Pirat, la vista del monumento estava muy sempatiko. De aki vinimos a las eskaleras ke se yaman 99 Steps. Mos ambezimos ke se topa aki la Sinagoga de St. Thomas ke era una Sinagoga Sefaradi. Mos fuimos a esta Sinagoga. Estava muy enteresante. En basho aviya arena, komo el dizyerto. De aki vinimos a Market i a Gallery Camille Pissarro. En el kamino vimos Ice Bar i entrimos. Es un bar ande es todo kon Buz. El bar, las mezas, las siyas, las kupas ets. En entrando vos estan dando vistimyentas para no yelar.
Alkavo vinimos a la izla St. Martin. La kapital, Marigot i Philipsburg. La izla es de los Fransezes i de los Hollandezes; por esto tiene 2 kapitales. La kapital se esparte kon una riga imajinaria, ke se yama Border Obelisk. Mos yevaron en primero a Fort Louis despues al bazar Marigot Market al park de Butterfly Farm, a la botika ande se azen los parfumes Tijon Parfumerie. Las plajes de aki se konosen en el mundo entero. Komo Orient Beach, Bikini Beach i Maho Beach. Es koza de ver estas plajes. La agua, la arena i tambiyen la vista panoramika komo una kartpostal.
Si vinimos al kavzo de la eskriturya ke vos konto kada semana, las supas del mundo ke bevimos, aki vimos en los restorantes mas muncho komidas de peshkado. Tambiyen supa de Peshkado. En munchas sivdades bevimos supa de peshkado ma aki vide en los restorantes esta supa de peshkado muy diferente. En dizyendo diferente aryento aviya munchos materyales, komo patatas, karotas, mais, banana, leche de koko, ananas, sevoya freska i sevoya seka, ajo, pipirushka, apyo i salsa de tomat. Mas de estos materyales se mete topizikos de masa ke se apareja kon arina i agua i sal. Siguramente peshkado en primero ke se eskaldo i se kita las ispinas, i el kuero i aryento de estos se mete unos kuantos produktos de mar komo kangreho, midyas, karides ets. La supa se apareja komo todos las supas de pishkado.
