Kuando era chika, kuando mos ivamos a la plaj, la primera koza ke aziamos era espandir las tovajas grandes en la arena. La krema, protektor solar, no era un problem de salud komo lo es oy, ma era un ayudante ke se utilizava para bronzearmos. Siertos protektores solar se aparejavan kon metodes mas naturales: las madres aparejavan una meskla de karota kon azete de oliva. Metiamos estas azetes a muestro puerpos.
En muestra chikes, el tiempo ke pasavamos en la plaj era yeno de aktividades. Pasar oras en la mar, djugar al waterpolo o al voleybol, konstruir palasios i pontes de arena eran los pasatiempos los mas komunes. Las largas konversasiones kon amigas eran esensiales en akeya epoka.
Mos kreiyamos ke si mos kemavamos del sol en enverano, no mos aziyamos grip en invierno. El sol mos dava rezistensia kontra las hazinuras. Akeyos dias, dingunos no konosia los efektos de la vitamina D. Todos repetavan la dicha transmetida de muestros antepasados: "Si el sol no entra a una kaza, entra el mediko". Esta dicha rezumava los benefisios del sol para la salud. Ma, kada koza ke es demaziya, se eskapa negro. Kuando pedriamos el kontrol i djugavamos voleybol durante oras, o eramos embabukados en un livro o una konversasion enteresante, mos kemavamos el kuero. Esta kemadura era muy doloroza. Muestra madre mos metia yogurt ensima las kemaduras. La freskor del yogurt mos kalmava la dolor.
En muestra jenerasion, dingunos se izo kanser de kuero de la ekspozision al sol. Si el sol fuera un peligro komo oy mos estan diziendo, una jenerasion entera se iva azer kanser.
Akeyos dias de plaj, kuando el sol estava en su punto el mas fuerte, mos ivamos a la solombra, i mos asentavamos en las sias de estera. Komiamos los sandwiches de tomat i kezo ke traiamos de kaza, kortavamos el karpuz, i duspues mos repozavamos un poko. La savor de este es.huenyo era muy diferente ke de durmir en un lugar kon ayre kondisionado. Durmir kon la boz del aire, la boz de las olas, i la golor de la mar no se puede topar oy. Kuando el aire de la tadre arefreskava, entravamos de muevo a la mar, i kedavamos en la mar asta la echadura del sol. Akeyos dias el sol no mos espantava, al kontrario mos mantenia kon su enerjia.
La kultura de plaj de muestra chikes era una eksperiensia simple i íntima. Esta kultura era mas serkana a la natura i aleshada de los instrumentos teknolojikos. Lo viamos al sol komo un amigo. La kultura de plaj de oy es formada kon datos sientífikos. Esta kultura ve el sol komo una menasa, i kontiene mas planifikasion i konsomasion.
