Los amigos ke me konosen en vezes me demadan ke les aga program a la sivdad ke se van a ir. Antes ke empeso la gerra kon los Rusos i Ukranyanos, un amigo kijo irse a Liviv ke es un sivdad de Ukraina. Empesi a aparejar el program de lugares de ver, ande komer ets. En tornando me konto ke izo el program komo le eskrivi i kedo muy kontente i del program i del la sivdad. Vos kontare i a vozotros el program ke apareji.
Izimos rezervasyon al otel en la plasa Rynok. Aki es el sentro de la sivdad. Kada diya i noche pasaron el tiempo mas muncho aki. De aki se fueron al Kortijo Italyano ke se yama La guerta de djuzgo Italyano. Es muy romantika, se topa aki unos kuantos kafes i restorantes. Kaminaron en las kayes grandes, el bulvar Shevckenko i Virmenska. La kaza de Munisipalita es de ver. Aryento tyene 400 eskalones i se suve a la kula Ratush. Metimos al program para vijitar el palasyo Potochki despues la shapel Boim, el simeteryo Lviv Lychakiv, la kaza de Opera, la High Castle ande se ve la vista Panoramika de Liviv, unas kuantas Katedrales diferentes Ortodoksas i Katolikas komo St. Andrew, St. George i de los Ermenis i de los Latinos. Por Liviv se dize ke es sivdad de los muzeos. Aki se topa muzeo de Farmakolojiya, kaza de shokola, kaza de bira i el muzeo militar i armas ets. Al park de Stryisky i la Tarasa Shevckeno ande se topa munchos monumentos, los meti al program. Komo kada sivdad ke tomo al program i aki meti al program la Sinagoga Golden Rosen. Los restorantes i los kafes son muy enteresantes por esto los meti en el program. Black Honey Cafe, Centaur Cafe, Coffee Manufacture The Pravda Beer, Theatre Grill Restoran, Kryivka Rest, eran los enterasantes para komer i bever. La gastronomiya de Ukraina paresea la de los Rusos. La pita parese komo Hachapuri de los Georgiyas. Las komidas Banosh, Vareniki, Holubtsi, i la supa Borch. Aki tenesh la resefta.
Materyales
500 gr Karne de vaka kon el gueso
½ Kupa de chay de azete
1 Kuchara de supa de salsa de tomat
½ Kol Chika
1 Kuchunugurya
2 Karotas
3-4 Tomates
2 Pimyentones vedres
1 Sevoya grande
3 Patatas
3 dientes de ajo
2 ojas de Aurel
Pimyenta preta, pimyenta kolorada, silantro, oregano, kimyon
Aparejar
Las karnes se meten aryento de una kaldera kon los Aureles i se desha a eskaldar. Las zarzavates se kortan delgadas i las patatas en kubos. Aryento de una kaldera se meten estas zarzavates a una a una i se sofriyen kada uno 3 minutos. Ensima se echa las espesyas i ensima se mete el kaldo de karne. Se serra el kapak i se aspera fin ke se buye. Despues ke se buyeron las zarzavates kon el kaldo de karne se meten aryento las karnes ke se dezmenuzaron en la otra kaldera. Despues de 10 minutos ke se kozyeron endjuntos se aze el servis kon una kuchara de krema ensima.
