En munchas kazas sefaradis, la komida traye plazer, ma tambien traye diskusyones. En la kaza mia, la diskusyon empesó kuando yo eskriví ke el armi de domat se aze kon sevoya.
Mi padre Moris, ke es un gran kozinero, empesó a inyervarse komo si yo avia metido pimienta al lugar de asukar:
— Armi kon sevoya? Esto es una desgrasya!
Yo le respondí:
— Baba ma en munchos livros i reseftas se mete un poko de sevoya…
El se riyó komo un sultán ke topó su enemigo:
— Livros, livros… Yo tengo la tradision de mi madre, Truf i de mi suegra Flor. I eyas, te lo digo klaro, nunka metieron sevoya en el armi.
La diskusyon se izo mas grande kuando mi primo trusho a la meza la famoza polemika turka del menemen: kon sevoya o sin sevoya. El kritiko, Vedat Milor izo una anketa en Twitter i el puevlo se divizo en dos. Unos dizen: “Si no ay sevoya, no es menemen.” Otros responden: “Si ay sevoya, no es menemen.”
Agora mirá komo la istorya se repete en muestro gizado sefaradí: armi kon sevoya o armi sin sevoya.
Al fin, mi madre me salvó la vida:
— Ke se aga komo se kere, kon sevoya o sin sevoya, lo mas importante es ke se koma todos endjuntos, ke se riya la famiya i ke no se peleen por una domatika.
I ansi la moral es esta: en la komida, komo en la vida, kada uno tiene su gusto. Ma la meza se aze para aunir, no para dividir. Kon sevoya o sin sevoya, lo ke importa es la savor de estar endjuntos kon los keridos.
