Ay munchas trajediyas istorikas ke estan relatadas kon la data del 9 de Av, el dia ke kontamos komo el mas triste en el kalendaryo djudio. Uno de los evenimyentos mas notavles ke tuvo un grande pezo sovre la komunita djudia i ke akontesyo en el 9 de Av, fue kuando Inglatierra i Rusia deklararon gerra a la Alemanya, i ansi empeso la Primera Gerra Mundial (ke kaye en el 1 de Agosto 1914).
Muncho fue eskrito sovre la destruksion ke rezulto en i despues de la Primera Guera Mundial, ke desho milyones de muertos, miles de infermos i firidos i una jenerasyon entera devastada. Para los ke nunka bivyeron una gerra, la grandeza de las perdidas es de verdad inimajinavle.
Para una grande parte de la povlasyon djudia de la Evropa, la gerra sinyifiko tanto revolusyones sosyales komo fizikas. El fronte del este, ande Rusia gerreyava kon la Alemanya i Austria, kortava por el medyo la vida djudia evropea. La armada rusa entro a la Galicia austríaka; los alemanes i austriakos entraron a la Polonya kontrolada por Rusia; i ansi en munchos otros lugares. Kuando las armadas enemigos pasavan las frontyeras, teniyan una koza en komun – su aborresyon kontra los Djudios.
Las dos partes en la gerra kreiyan ke los Djudios eran enemigos o a lo manko ayudavan al enemigo. En la Rusia Tzarista, miles i miles de Djudios se entregaron a la armada. Malgrado esta realidad, la povlasyon Djudia fue akuzada de fuyir del servisyo militar, de aprovecharse del komersyo, azer karaborsa i de suportar al enemigo. Komunitas enteras de Djudios fueron ekspulsadas de sus kazas serka del fronte i mandadas mas aryentro en Rusia.
Los Djudios en Alemanya i Austria tambien respondyeron a la yamada patriotika. Ma komo en la Rusia, el governo no teniya konfiensya en eyos. En 1916, el Komandamyento Jeneral alman ordeno el “Judenzählung”, un senso de los soldados djudios, kon la intensyon de ver si los djudios estavan atados a sus doveres patriotikos. Los rezultados mostraron ke los Djudios estavan en todos los frontes en proporsyon kon sus povlasyones en el paiz i ke eran onestos i devotos. Ma los rezultados ke se publikaron, diziyan el kontraryo…
Mas aya de la destruksyon de las komunitas i las difikultades ekonomikas, el rezultado el mas terivle de la Primera Gerra Mundial fue ke las sospechas de los tyempos de gerra sovre la povlasyon djudia se transformaron en una kreensya ke los Djudios eran los kulpavles de la desfecha alemana (akuzados de empesar la gerra para dominar el mundo) i de estar detras de la Revolusyon Bolshevika ke transformo Rusia en la Union Sovietika. I estas akuzasyones fueron empleyadas durante la Shoah…
