Oy vos va kontar de LABUBU. Kualo es Labubu?
Labubu es un djugete chiko ke parese a un taushan peludo. Tiene orejas largas, ojos grandes i una kara kon una sonriza de malisya. Kavzo una lokura grande en el mundo entero. Estos Labubus son de kolores a kolores i ay grandes i chikos. Se puede tomar en la mano komo kukla o se puede enkolgar al garon komo kolye i mizmo se puede enkolgar a las chantas komo dekorasyon.
Kuando se kere merkar un Labubu, se merka aryento de un kuti i aryento de un anvelop. No se save ke kolor de Labubu ay aryento. Komo dizen en turko “ne çıkarsa, bahtına”. Lo ke sale a tu shans. Ay personas ke azen la koleksyon de estos Labubus. I ay ken aze troke si tienen de menester de alguna kolor. Para merkar estos Labubus en los mas grandes magazenes de la Evropa estan aziendo kolas de kilometros. No es shakas. Ay fotos. Ay ken se echa delantre del magazen para ke al diya ke se va avrir el magazen, le venga la sira para merkarlas. No vos pareska ke son baratas. Ay Labubus a miles de euros o dolares.
Labubu nasyo de la imajinasyon del artisto Kasing Lung, un chinezo, se izo milyonario kon este invento.
Dizeremos ke una persona kere azer koleksyon de este Labubu. Se fue merko uno, a la sorpreza le salyo amariyo. Ok. Merko otruno, le salyo de muevo amariyo. Guay ya se inyervo. Kuando merko el treser i le salyo amariyo, salyo loko. Kere otra kolor. Yoros, males, pelarse kaveyos. Ke aze? Pishin da un anunsyo al internet. Dize, tengo Labubus amariyos, ken puede trokar kon mi kon blu, o roz. Otro ke tiene el mizmo problem, le responde. Dame amariyo, te dare vedre. I ansina se izo un klub de troke de Labubus. En un mundo de konsumo rapido, Labubu es un egzemplo. Se izo serias i en kada seria ay un tema diferente, un vistido muevo, una kara mueva, ma su alma se keda. Unas vezes viene kolores dulses de makaron, otras en estilos de kampo salvaje i otras kon briyos del mundo de esfuenyos.
En sus ojos ay un poko de malisya i en su boka tiene dientes puntudos. Komo si mos kere dizir “no so perfekto, ma ansina tengo valor”.
