HESED LE AVRAAM es la primera i unika sinagoga de Büyükada. Se konstruyo en el reynado de Abdulhamid II. Para ke orasyonen la populasyon djudia de la izla. Los kampanyeros de enverano orasyonan noches de Shabat i el diya de Shabat, tefila, minha i arvit.
Un buen djudyo nombrado Avram Fresko Efendi, dyo el tereno, por esto la sinagoga se nombro Hesed Le Avraam ke kere dizir la buendad de Avraam.
La sinagoga de Büyükada avryo las puertas el 30 de Marzo en el anyo 1904 i la seremonia de inogurasyon tuvo lugar el 1 de Avril 1904.
Desde akel tyempo fin el diya de oy se avre en el mez de Junyo i se serra dospues de Roshashana i Kipur.
Esta ermoza keila, kada martes la noche aze unas aktividades maraviyozas. Avlantes famozos, eskritores, doktores mos dan konferensyas i mos enforman de munchos sujetos.
Esta semana aresivyeron dos artistos famozos del Dostluk Yurdu Derneği i de muestra komunidad, JOJO ESKENAZİ (MOİZ) i FANİ BONOFİYEL (KLERET).
Fani kon Jojo (Moiz i Kleret) en la shena son marido i mujer kon la umor aktual i kon la improvizasyon de JOJO mos izyeron riyir i pasar una noche inolvidavle.
La nochada se serro kon la lotaria ke azen kada semana i kon el ermozo tratamiento.
Grasyas a todos los organizatores de HESED LE AVRAAM i grasyas a JOJO ESKENAZİ i A FANİ BONOFİYEL.
