Si divizamos la vida en 4 partes iguales, la ultima parte es la parte la mas importante, porke si nombramos las partes de la vida, la chikes kon la manseves, i edukasyon es 0-25, empesar a la vida, echo, lavorar, i azer famiya es 25-50, la eksperiyensa, i la madures es 50-70, la saviduria, partajar la eksperiansa, estar orozo, i malorozamente asperar!!! es 70 i dospues, por esto es muy importante el ultimo kuarto de la vida.
Komo ya savesh, el tyempo esta pasando komo agua, i no estas puedyendo entender, parese ke dainda era ayer, i eramos mansevos, todo esta empesando muevo.
I enduna estas vyendo ke vinites al ultimo kuarto de la vida, agora es tyempo de partajar lo ke te ambezates de la vida kon el entorno, porke sos una persona madura, i kon eksperiensa. De agora deves inchir la vida tuya kon ermozuras, agora es tyempo de gozar, nunka no tomes komo egzempyo, de los vyejos ke se asentan en kaza, i se aravyan kon la vida. La vida syempre es ermoza, lo importante es kreyer i kerer. No te arrepientes de lo ke no pudites azer, la edad no es importante, nunka no es tadre para nada, si tu salud permete. En dizyendo salud no te olvides ke la mas grande rikeza ni djoya, ni paras, ni kazas, ni bienes solo, solo es sanedad.
La vida es un regalo para ti, i tu estilo de vida es regalo para los ke vienen dospues de ti, bive byen tu vida, toma savor del tyempo, de los amigos. Akodrate lo ke azes agora es mas importante de lo ke izites en el pasado. No te olvides ke la vida es mas valoroza agora, salir afura es ermozo, ma tornar a kaza es mas ermozo...
Un grande abraso.
