Un diya me desidi de irme a Prag. Viyana, Budapest, Bratislava i Prag son las sivdades las mas famozas de la Evropa Sentral. Mas antes ya me fui i vide las otras sivdades. Dishe kale ir i a Prag porke dizen ke es una sivdad komo un Muzeo al ayre. Ya ize el program, ya tomi el bilyeto i ya rezervi el otel i me fui. Tomi un tur del otel para ke me kamine kon Gia. Izimos un tur en kaminando la sivdad. Prag es chiko ma ay de ver munchas kozas komo muzeos, iglesyas, kayes, kupris, la maalle de los Djudyos ets. Pasimos kaji 3-4 oras kon el gia; en kaminando me amostro la sivdad i me konto la kultura de Chekya. Ensima del rio Voltava ay munchos kupris. El mas ermozo i famozo es Charles Bridge. En este kupri se topa monumentos de los santos. De aki se pasa enfrente ande se topa el buro i la kaza del Prezidente. Despues vinimos a la ora astronomika. Kada ora empesa a sonar i sale de aryento figuras. Los turistos travan fotos de enfrente. De aki en 2 minutos se viene a la plasa ande se topa la Iglesya grande de Prag kon el monumento de Jan Hus ke era el fondador del Protestantizmo. De aki vinimos a la maalle de los Djudyos. Ay Sinagogas viyejas, simeteryo viejo, es muy enteresante no solo por los Djudyos ma tambien para todos. Kamini las kayes Na porici ande aviya la kaza de la munisipalidad Namesti Republiky. De aki vine a la kaye Na prikope ande topi unos kuantos restorantes Kasheres. Komi en el Restorante Golan. Despues de komer empesi a kaminar la kaye, Namesti i Vaclavske ande aviya el muzeo National Museum. De aki kon metro vine a VYSEHRAD, ke es un montanya chika. De aki se puede ver Prag entero en panorama. En tornando vide ke aviya un konserto en una Iglesiya, me entereso i entri. Las personas Chekyas se enteresan en la muzika klasika. Si vinimos al sujeto de la eskriturya, kuando me fui al restorante ke mos fuimos a una kaza de montanya ande aviya komidas bestias kasadas komi por primera ves la supa de Brokoli, estava muy savroza. Este karar me plazyo ke le demandi komo se aze i me konto el garson.
Materyales
1/2 Kilo de Brokoli
2 Kuchara de supa de arina
1 Kuchara de manteka
2 Kucharas de azete de oliva
2 Dientes de ajo
6 Kupas de agua
1 Kuti chiko de krema 200 mg
Sal i pimyenta
Aparejar
La arina se sofriye kon la azete unos kuantos minutos. Por aki los Brokolis despues ke se lavaron, se kortan. Aryento de la arina ke se sofriyo, se vazya la agua. Aryento se mete los brokolis i el ajo i fin ke se buye, se karishtereya. Despues se trava en el blender, ensima se echa la krema i se karishtereya. Kuando se aze servisyo si vos plaze se puede echar ensima unas kuantas gotas de de salsa kemando.
