La istorya muestra empesa en el anyo 1895, en la kaye “Rue de Pera”.
Un famozo farmasien fransez, Jean Cesar Reboul, viene a Estambol, i de aya se va a Trabzon, para vijitar a su padre ke lavorava komo injenior en la konstruksyon del kamino “Hopa-Trabzon”. Estambol lo enkanta kon su mezkla de komersyo moderno i misterio del mundo viejo. En el korason de Beyoğlu, Pera, el deskuvre su vokasyon i la istorya empesa en Pera kuando avre “la Grande Pharmasie Parisienne” - Büyük Paris Eczanesi, ke era una de las primeras farmasiyas de la Turkiya.
En los anyos de la Republika, uno de los primeros parmasyenes turkos, Kemal Müderrisoğlu se prezenta a Mr. Reboul kon el dezeo de azerse su chirak en esta famoza farmasiya. Para esto tuvo ke ambezarse el fransez. Se eskrivio en kurso de linguas en el konsolato de Fransia, i el anyo sigiente torno a la farmasiya.
Kuando Mr. Reboul le demando porke keriya entrar aya, el respondyo: “Yo se ke sos un farmasien diferente i por esto yo kero ambezarme de vozotros”. Ansina ampeso su chiraklik en 1920.
En 1923 kuando Kemal se graduo de la primera jenerasyon de la fakultad de farmasiya, de la Universita de Estambol, refuzo una oferta del governo, para kedarse kon su maestro. Durante 10 anyos lavoraron mano kon mano kon pasyon por el arte farmaseutiko.
En 1936, Mr. Reboul lo izo haver, i la farmasiya tomo el nombre de “Kemal ve Reboul Eczanesi”.
La fama de la farmasiya se adelanto en Estambol entero. En el anyo 1938 ampeso la istorya de la kolonya ikonika “Reboul lavanda”. Primer echo kon lavanda, kresyendo en la guerta de Mr. Reboul, i despues kon flores rekoltadas de las kampanyas serkanas i de Grasse (Fransia). Esta kolonya se izo perfum de los judios i beyefendis de Pera. Se kontava ke para salir a pasear en Beyoğlu, kaliya meterse Reboul Lavanda. Esta kolonya era parfumo, remedyo, regalo prestijiozo - todo en uno. En 1981, la “Reboul Lavanda” resivio una medalya de oro del “Sentro Mundial (CM) de Kontrol de Kalitad de Produktos de Ermozura”.
En 1939, Mr. Reboul torno a su patriya, la Fransya. El entrego su presyoza farmasiya a Kemal Müderrisoğlu. La farmasiya se yamo desde entonses simplemente “Reboul”.
De 1895 asta oy, esta farmasiya kontinuo su aktividad en el korason de Estambol, produsyendo remedyos i kozmetikos en sus laboratoryos, kon fidelidad a su tradisyon.
La eksperiensa akumulada durante mas de 130 anyos, paso de jenerasyon a jenerasyon.
Inspirandose en el atelye orijinal de kozmetika, “Atelier Reboul” bive el espirito de la sosieta, de la siensia kon la pureza de la natura. La marka Reboul, nasida de la vizyon de Jean Cesar Reboul kontinua en siendo el simbolo de la kalitad i del arte farmaseutiko.
