Kuando la persona avansa en edad su espirito se bola verso evenimyentos dulses u tristes ke pasan komo un filmo de kolor delantre sus ojos.
Mi ijo teniya manya de oyer a mi padre, ke kontava su grande famiya de 8 ermanos i ermanas, su kaza en Rodosto, Tekirdağ i otros detalyos. Kada uno seya Doktor, seya Komersante unos se fueron a L’Amerika. Mi padre el chiko de la famiya lo mandaron a Salonik, al Grande Komerso Laik Fransez. I estudyo en eskola İngleza.
Mi Padre eskrivyo a un sentro Judyo de Los Angeles dizyendo ke el nomado Nisso Bensussen, ya va enkontrar su ermano ke no se vieron mas de 50 anyos. Letras i fotografiyas de la famiya de la Amerika estuvo vinyendo. I un diya aresivimos un telegrafo del ermano de la Amerika ke fin uno u doz diyas va vinir kon su ijo, un ayre de lokura paso por la kaza no savyendo ke djentes son. En fin el diya tan esperado arivo, mos vistimos, mos aluzimos i mos fuimos a al aeroporto Yeşilköy, asperar el Avion. Mi padre pensando fin al punto de alkavo ke es una shaka.Vimos abashar dos Amerikanos kemados del sol, vistidos kon shortes. Mi padre grito “Nisso”. Todos estavan mirando esta shena, dos vyejos puntando del dedo uno al otro. La vista estava tan emosionante ke todos se kedaron para mirar, tanto ke el servisyo de segurita izo avrir la puerta de komunikasion. Los keridos ermanos enfin se abrasaron.
Era un diya komo oy… Oktobre serka de Rosh Ashana, i kualo demando mi tiyo? No se alevantan aki para Selihot? En kontando me esto akodrando todos los lugares ande los yevimos, las Keilotes i mizmo el kafe kon muzika de su manseves. I para mozotros se avyo la era de la Amerika, mi ijo, mi marido fueron a Los Angeles. I eyos ermanos, ijos, inyetos todos vinyeron.
I kada noche de Shabat antes de Shabat, largas konversasiones kon telefones i una vez kon televizyon mi Primo mos amostro lugares ke no se alkansava a ver del todo.
Todo ya esta en el pasado komo todo modo de koza en el mundo, ma la figura de dos vyejos abrasandosen i yorando no lo puedo olvidar i bive sympre en mi korason.
