Kon el empesijo del enverano, en muestra chikes, el grande entretenimiento era los sinemas de enverano; akeos anyos eran ke dainda no aviya televizyon. Kuando se serravan las eskolas, se avriyan los sinemas de enverano. En kada maalle minimum aviya 2 u 3 sinemas. Estos sinemas solo la noche amostravan filmos, tambien eran lugar para sosyalizasyon, de 7 anyos, fin 70 anyos diferentes personas viniyan kada noche. Liblibizes, gazos i pipitas eran indispensavles, todos viniyan kon sus kavesales, porke los lugares para asentar, las siyas eran de tavla. El perde del sinema era boyadeyado kon kal blanko, si no se boyadeyava bueno, el filmo no se viya byen. En kaza antes de komer empesava la emosyon. Para no kedar tadre, dospues de komer mi madre me mandava en primero a mi, para ke entre a la kola, porke antes una ora empesava la kola para merkar bilyetos. Las kazas ke estavan en el entorno del sinema eran muy mazalozas porke de los balkones lo viyan el filmo debaldes, kada noche djugava filmos diferentes, ma en vezes aviya filmos ke djugavan 2-3 noches porke eran muy ermozos. En vezes, en la parte mas emosyonada la tira del filmo se rompiya, i se avriyan las luzes. El makinist si no lo aziya presto empesavan todos a chuflar, i dospues palmas; me plaziya muncho porke en este momento viniyan los vendedores ke vendiyan frigo, gazoz, i mos miravamos ojo kon ojo kon mi madre, ya entendiya ke keriya una koza, i me tomava gazoz. En vezes antes de empesar el filmo saliya un kantador i kantava 2-3 kantikas, i esto para la noche era una ermozura. Kuando se eskapava el filmo i se avriyan las luzes, en basho ya no se viya mas de las kashkaras de pipitas. Algunos ugrasheyavan para espertar a su ijo, i ken bushkava lo ke peryo. Lo mas importante era la salida del sinema, porke en la puerta estava asperando el misirdji, el turshudji, el dondurmadji, agora ven sale a bash kon los chikos, los ke estavan durmyendo en los brasos de las madres, u de los padres no saviyan nada, ma komo mozos ke estavamos espyertos empesava el problem, porke keriyamos de todo i fin ke yegavamos a kaza pasava un djumbush. Kuando mos empesimos a azer mas grandes, empesimos a ir solos kon las amigas al sinema, mano kon mano, i kon bezikos chikos, i a la salida del sinema, mano kon mano koryendo i gritando, grasias a la vida. Agora si damos milyones ken mos vende estos diyas ermozos, mas no vyenen atras, por esto kale saver la valor del tyempo.
Diyas buenos, kon alegriya, i kon sanedad... Abrasos
