Me namoro de ir a Gresya, kuando topo okazyon. Atina, Alexandropolis o diferentes izlas komo Thassos, Samos, Chios, Lesvos, Kriti i las izlas mas Sosyetik komo Mykonos i Santorini. No es para mi para pasar vakansas. Si vash a pasar la luna de myel, o sino aniversaryo de kazamyento ets son izlas romantikas. Ma las otros izlas ke konti ariva para vakansas sol, arena, i mar es lokura. La mar es komo vidrio. El aver i el ayre es maraviyozo. La Gastronomiya parese a la de Turkiya. De los bodre de mar, de sivdades ke se topa en el Egeo, por egzempyo de Ayvalık se puede pasar a Lesvos, de Kuşadası a Samos, de Çeşme a Chios, de Fethiye a Rodos, i de Bodrum a Kos i Leros. De estos kazales se alevantan feribotes a estas izlas. Si keresh kon araba puedesh ir a İpsala, de aki se pasa a la Gresya en el kamino de Alexandropoli se entra a Keramoti, de aki kon feribot se pasa a la izla Thassos. A mi i los amigos kon los kualos viyajamos endjuntos mos plaze mas muncho este izla Thassos. Mos kedamos en el otel ke es muy serka a la eskala de feribot, Otel Timoleon. Es en el sentro de Thassos muy serka al charshi, a los restorantes ke mos plaze muncho Mythos, Alexandra i Simi. Estas son meyanes Gregas kon muzika. En el bodre de la mar se topa restorantes Bistros i Italyanos. Puedesh komer aya karnes o Pizza i makarones. Ay patiserias i ornos de ande puedesh merkar borekes ets. Los koyes son muy ermozos, i tienen plajes kon restorantes. Aliki Beach es detras de la izla ma mos plaze ir aya, entrar a la mar i komer en los restorantes de la plaj. La plaj Marble Beach i el Lagun Giola son muy enteresantes. Si vos vash, en primero kale ir i ver estas mares i beaches. En los restorantes kuando damos el orden absolutamente la salata Grega, ke parese a la Choban salata ensima kon kezo Feta, Tzaziki, ke se apareja kon yogurt, Saganaki, es komo kezo pane, Pabuchaki es de berendjena komo kucharikas. Kalavasa frita ke se yama kolokithakia tiganita. Kon estos mezes me plaze el raki ke se yama uzo la marka Barbayani. Los pishkados fritos o asados los azen muy savrozos. Oras de midi en las plajes vide ke estan bevyendo supa; le demandi al garson ke supa es esto; me disho es spesyal una supa ke se apareja kon gaina i fideyos, i me dyo la resefta. Aki la partajare kon vozotros.
Mateyales
4 Butes de gayina
1 Sevoya kolorada
2 Karotas
5 Kupas de agua
2 Guevos
1 Limon
½ Buketo de dereot
Sal i pimyenta preta
Aparejar
Las Gaynas se meten aryento de una kaldera, ensima las karotas ke se kortaron en pedases chikos i la sevoya, ensima se echa las espesyas i agua fin ke se tapan las gaynas. En primero se aspera ke buyga la agua, despues se amengua la lumbre i 30 minutos kon el kapak serrado, se aspera ke se kozgan. Despues ke se kozyo se kitan la gaina a un chini. Aryento del kaldo ke esta en la kaldera se mete los fideyos i se kozen fin ke se ablandan. Ensima se mete los guevos ke se batyeron i kon el limon se aze la sos. Alkavo se mete las gainas a la kaldera fin ke se kaynta se aspera kuando se aze el servis se mete ensima un poko de dereot.
