En un chiko kazal, biviya un ombre vyejo. No era riko. No teniya ni tierras, ni paras. Ma, teniya un ermozo kavayo blanko. Todos en el kazal, admiravan el kavayo. Munchos rikos keriyan merkarlo. Ma, el vyejo kada vez ke le propozavan, los refuzava. Diziya: "Este kavayo no es para vender. Para mi, no es solo un kavayo. Es mi amigo, mi famiya". Los kazalinos diziyan ke el vyejo es bovo. Puedes vender este kavayo, i bivir una vida repozada, le diziyan. Ma, el vyejo respondiya: "Las paras puede merkar munchas kozas, ma no puede merkar la pas". "Yo esto orozo tal komo esto".
Una demanyana el vyejo no lo topo al kavayo en el ahir. El kavayo se aviya ido. Kuando oyeron esto, los kazalinos vinyeron koryendo. "Tu kavayo se fue. Komo de negro mazal. Deviyas de venderlo kuando teniyas la oportunidad". El vyejo disho a boz basha: "Puede ser ke es negro, puede ser ke no es". Los kazalinos no estavan dakordo. Estavan dizyendo ke el vyejo keriya guadrar su tristeza. Tres diyas duspues, el kavayo vino atras. Ma, no estava solo. De las montanyas trusho tres kavayos salvajes. Los kazalinos se sorprendyeron. "Tyenes muncho mazal. Pedrites uno, topates kuatro. Esto es un milagro". De muevo el vyejo disho; "Puede ser ke es bueno, puede ser ke no es. La vida tyene una forma de ekilibrar las kozas. Devemos de asperar lo ke va trayer duspues". Los kazalinos estavan konfundidos. Ma el vyejo no troko. Kedo kalmo.
Su ijo ke era mansevo i fuerte empeso a entrenar a los kavayos salvajes. Keriya ayudar a su padre i azer ke los kavayos seygan provechozos. Ma un diya, en suvyendo a un kavayo salvaje, el mansevo se kayo. Se rompyo una pacha. La lezyon era grave. Los kazalinos vinyeron de muevo. "Komo de negro mazal. En primero, el kavayo se fuyo, duspues vino atras, agora tu ijo se rompyo la pacha". El vyejo disho a boz basha: "A las vezes, el kamino ke estava indo bueno troka, i se aze yeno de dolor. Syempre no puedemos ver la mas grande fotografiya. Los kazalinos meneyaron la kavesa. No estavan entendyendo komo el vyejo estava puedyendo estar kalmo. Unas kuantas semanas duspues, afito una koza terivle en el reynado. La gerra empeso. Los soldados del reynado vinyeron al kazal i ordonaron a todos los mansevos de unirsen a la armada. Se yevaron a todos los mansevos. No se yevaron al ijo del vyejo porke teniya la pacha rota. Los kazalinos se kedaron sin palavras. Disheron "Teniyas razon. La pacha rota de tu ijo le salvo la vida. Todos muestros ijos estan agora en peligro". El vyejo disho: "La vida syempre va i vyene entre el byen i el mal, la alegriya i la dolor ma todo afita por una razon ma mozotros no puedemos ver la razon. Las kozas syempre no salen komo keremos. A vezes peryemos una koza i mos sintimos rotos. A vezes, las bendisyones vyenen en forma de problemes ma la verdad es ke la vida es muncho mas grande de un momento".
El vyejo en esta istorya no reaksyono kon kolora, ni kon tristeza. Prefero estar kalmo, asperar i tener konfiyensa al kamino. A la fin todo tuvo senso. Esto es el mesaje. No djuzgas las situasyones muy presto. Lo ke parese una maldisyon puede konvertirse en una bendisyon. Lo ke te indjideya oy, puede protejarte amanyana. Konserva la fe, azete fuerte i akodrate syempre ke todo afita por una razon.
