Los diyas de Rosh Ashana, la boz del Shofar es tanto fuerte ke se oye de leshos i tyene una enfluensa profonda enriva del espirito i los korasones. Para ke entendemos mijor esta idea, el selebro Rav Rabi Yitshak mos konta en egzempio esta konsejika:
Un Rey potente salyo a la shaara, ma en el kamino su kavayo se espanta, echa al Rey en basho i se fuye. El Rey se topa en una postura apretada i se mete al kamino para topar remedyo i tornar al dezeyozo Palasyo. El tereno grande i ya ampeso a areskureser i el estava ambyerto. En supito vido un grupo de mansevos arando i sembrando. Adresandose a eyos demando piyadades i les disho ke es el Rey del Reynado. Los mansevos se burlaron de ver ke esta arazgado, ke tyene un ayre miseravle. El Rey kontinuo su kamino en demandando ayuda ke no resivyo de dengunos. Arastandose en supito vido en estas oras apretadas una kazika kon un ombre aedado bushkando un poko de pan. Vyendo al Rey lo rekonosyo pishin, lo asento i le dyo una supa ke lo arebiva.
El Rey entonses lo yevo al Palasyo, le ofresyo rikeza, i le dyo misyon emportante en el palasio i regalos valorozos.
En el silensyo del environimyento, la Boz del Shofar se oye en estos diyas ke se aserka del mez de Elul, mez de Teshuva i Rahamim.
El Shofar esperta muestros korasones, mos akodra de ordenar muestros doveres i una vez mas muestra eternidad. Puevlo eterno seya muestro guadrador Ashem, i seyamos eskritos en livros de Vida i de Piyadad.
El Shofar ya sono
Muestros korasones esperto
Komo un sople del pasado
Komo una ovra de eternidad
El Shofar ya sono
Avizando, Avinu se mostro
Arogando a su Dyo
Ke a su ijo lo salve
El Shofar ya sono
El Mundo se enkorvo
Delantre su Splendor
Ke a todos arelumbro.
