Kuando mos fuimos al Sud Amerika el program era en Argentina Buenos Aires, en Uruguay Coloniz del Sacramento, en Brasil Rio de Janerio i Sao Paulo i en la frontyera de Argentina kon Brasil la Kaskada Iguazu. Oy vos kero kontar un poko los lugares ke kaminimos en Buenos Aires i un poko de las komidas i de la gastronomiya. El otel ande mos kedimos estava en la mas grande kaye ke egziste en el mundo 9. Jull. Av i se yamava Hotel Brizo. De la kamareta se estava viendo esta kaye i el Obelisko ke se topa aki estava komo fotografiya en frente. Del otel se puedia ir en kaminando a la kaza de Opera Colon. Kuando empesimos al tur vimos parkos buen karar de grandes, muzeos de arte, universidades, kada lugar ke estavamos pasando estava yeno de kolor vedre porke estava yenos de parkos. Despues salimos al tur del rio Tigre. En este rio la vida esta pasando aryento o en el bodre de la agua. Los marketes, las Iglesiyas, los taksis de rio, el ambulans, lo ke ay en la tierra ay aryento del rio. Despues ke tornimos del tur ke izimos en el rio vinimos a Casa Rosada ke es palasyo presidensial. De aki vinimos a Plaza de Mayo. En la kaye ke se yama Alvear se topa el kafe otantiko Tortoni. La Boca es un barrio muy emportante por Buenos Aires. El futbol, el bayle i el Tango se puede dizir ke nasyeron aki. Recoleta es un semiteryo komo muzeo de arte avyerto. La djente beven Mate. Es un chay spesyal ke se beve kon una kupa espesyal. Empanada es una komida spesyal de todo sud Amerika. Las karnes asadas se konosen por el mundo entero. En komyendo kale azer atensyon para no komer i los dedos. El restoran Kasher se topa Al Galope Kosher Restaurant, Tucuman 2633 C1052ABE B.A Komo kada vez eskapare en kontandovos una supa ke se beve muncho aki.
Materyales
4 Sevoyas sekas
4 Dientes de ajo chafteyadas ½ Kangal de Sucuk kortado en kubos 1 Kupa de agua mais eskaldada
2 Pimyenton de Chili kortados komo mechas
1 Kupa de agua de barbunya eskaldada 1 kuchara de chay de kimyon
1 kuchara de chay de pimyenta kolorada
3 Kucharas de supa de azete de oliva
5 Kupas de agua de kaldo de karne Sal i pimyenta preta
Aparejar
La azete se mete en una kaldera, despues se mete aryento las sevoyas ke se kortaron chikas, los ajos i el sudjuk ke se korto en kubos, i los pimyentones chili se sofriyen todos endjuntos. Despues se meten las Barbunyas kon el Mais ke se eskaldo i ensima las espesyas. En fin se mete aryento el kaldo de karne i se desha kozer 15-20 minutos. Es una supa ke arta muncho.
