Un sientifiko estava siempre okupado kon los problemes del mundo i keriya absolutamente topar una solusyon. Pasava los diyas i las noches en su laboratorio, bushkando repuestas a sus dubyos.
Un diya su ijo de siete anyos, entro a su kamareta ande lavorava i disho ke kere ayudarle. El sientifiko un poko deranjado por esta vijita, kijo ke el ijo se vaya. Ma no lo kijo blesarlo. Kuando vido ke no era fasil de mandarlo afuera, se okupo de toparle alguna koza para ke se engleneye.
Korto de una revista una karta jeografika del mundo, lo korto en munchos pedasikos, i se lo dyo al ijo, i le disho:
-A ti te plaze azer puzzles, no? Alora toma, aki tienes el mundo entero. Vamos a ver si lo vas a pueder areglar. Azelo tu solo.
El savyo pensava ke el ijo va tomar dos diyas para eskapar el puzzle. Ma despues de unas oras, oyo la boz de su ijo.
-Papa ya eskapi. Ya enderechi todo.
El padre no se kreyo. No era posivle ke un ijiko de syete anyos pueda enderechar la karta jeografika del mundo ke nunka aviya visto. Ma desho sus papeles i fue a ver lo ke izo el ijiko, pensandose ke va aver un dezorden.
Ma su sorpreza fue grande porke la karta estava perfektamente bien echa. Todos los pedasikos estavan en su lugar.
-Komo es posivle esto? le demando al ijo. Tu no saves komo es el mundo.
El ijo le disho: Es verdad, yo no se komo es el mundo. Ma kuando kortates la oja, yo vide ke en el otro lado aviya una foto de un ombre. Yo en primero aprovi de enderechar el mundo, ma no pude. Alora me akodri de la foto del ombre i ampesi a enderechar el ombre. Esto ya se komo deve de estar. Kuando eskapi de enderechar el ombre, lo torni al otro lado i vide ke el mundo ya estava enderechado.
La moral: Kuando enderechamos el ombre, el mundo se enderecha solo.
