Otruna oja preta en la istorya Djudiya relatado al mez de Julyo…
Vel d’Hiv era el nombre kurto ke teniya el Velodromo de Invyerno (un velodromo es un espasyo para kompetisyones de siklizmo -bisikleta-). Komo era un stadyum kuvrido, serviya para las kompetisyones en invyerno de ande vino el nombre d’Hiv(er). Se topava en la kaye Nélaton, en el 15en arrondissement en Paris. Este stadyum fue la zona ande entre 7.000 i 13.000 Djudios etranjeros i apatrides fueron detenidos por la polisiya franseza i fonksyonaryos de toda la sivdad entre el 16 i el 17 de Julyo de 1942. El shifro ofisyal de los arestados en estos dos dias es 13,152 inkluido 4,115 kriyaturas debasho de 14 anyos. Despues de sinko dias, los detenidos fueron embiyados a kampos de transito i de aya lo mas de eyos fueron embiyados a Auschwitz, ande la mayoriya fueron asasinados. Los mas konosidos de estos kampos de transito eran, Compiègne, Drancy, Pithiviers i Beaune-la-Rolande.
Las mezuras kontra los Djudios en Fransiya se entansifikaron en 1942. En Mayo, los Djudios fueron ovligados a yevar la “Estreya Amariya”, i en Junyo, la SS i los fonksyonaryos fransezes se reunyeron para desidar los asoltos kontra los Djudios al nivel nasyonal. El Chef de la polisiya franseza, René Bousquet, i el ministro de relasyones kon Djudios de Vichy, Louis Darquier de Pellepoix, partisiparon en los preparativos i tomaron la aprobasyon del SS para trokar la data del arekojamyento de Djudios del Dia de la Bastille (14 de Julio) al 16 de Julio. El Chef de la polisiya de Paris, Emile Hennequin, embiyo los planes detalyados de las operasyones a las polisiyas de los distriktos el 13 de Julio. La polisiya enkargada de detener a lo manko 28.000 Djudios en la rejyon de Paris, resivyo el orden de informar kada ora.
Verso la fin de 16 de Julio, la polisiya de Paris, ofisyales fransezes i myembros del partido polítiko antisemita i fashista Parti Populaire Français, liderado por Jacques Doriot, aviyan detenido a mas de 11.000 personas, inkluyido 3.625 kriyaturas. 6.000 fueron embiyados imedyatamente al kampo de transito de Drancy. El resto de los detenidos kedaron sekuestrados en el Velodromo durante los sinko dias sigientes.
Aryento del Vel d'Hiv, el tejado de vidro estava serrado i boyadeyado kon azul para konformarse kon las normas de empreteser de gerra, lo ke provokava una elevasyon de la temperatura kon la kalor del enverano. Aviya un ijyen inadekuado i una mankura de alimentos i agua. Solo la Kroche Kolorada i los kuakeros miraron de abastar ma sin rezultado. Estas mankuras provokaron un rapido deteriorasyon de las kondisyones.
Sinko dias despues, los detenidos fueron embiyados a los kampos de Drancy, Pithiviers i Beaune-la-Rolande. Los adultos fueron separados de sus ijos i deportados a Auschwitz. Otras 3.000 kriyaturas fueron deportadas a Auschwitz mezes despues i fueron asasinadas. En total, aproksimadamente 77.000 Djudios en el teritoryo fransez fueron asasinados en kampos de konsantrasyon i sentros de eksterminasyon.
El Velodromo fue derrokado en 1959 i en los anyos 60 fue konstruido en su lugar un edifisyo de ofisinas.
