1-Un ombre teniya una gayna, ke dava guevos kada dia, ma lo ke emporta era ke los guevos eran de oro. I todo los dias, el ombre tomava uno, u dos guevos de oro de la gayna. I lo vendiya kon muncha ganansia, i le demandavan de ande estan vinyendo estos guevos, a dingunos no estava kontando lo de la gayna, i se estava azyendo riko. Esto era un nes del Dio, ma el ombre no estava pensando este modo. Un dia se penso, se penso, i de si para si se desido, al lugar de tomar guevos uno por uno kada dia, prefero tomar todo en una vez. La korta la gayna, para tomar todo los guevos de oro para azerse mas presto riko. Ma malorozamente la fin no se izo komo keriya el.
La leson de esta istorya es: Kontentate kon lo ke tyenes, si no lo piedres todo. Proverbo sefardi: el ke kere lo muncho, piedre i lo poko.
2-Un dia un vendedor kon su azno estavan indo al bazar, el vendedor esta delantre, i el azno detras. En supito un grande grito oyo el vendedor, i miro atras. Vido ke el azno se kayo aryento de un pozo ondo. El azno esta yorando, el vendedor esta gritando para topar ayuda, i pishin algunas personas vinyeron, ke estavan pasando de aya, para ayudarle. Ma no pudyeron kitar ahuera al azno. I el vendedor se desido ke el azno ya estava viejo, i el pozo estava seko, i por esto kale serrar el pozo disho, i kon las personas empesaron echar tyerra aryento del pozo. Entervalo el azno ke estava yorando en supito se korto la boz, el vendedor finalmente miro aryento del pozo, ke ve: el azno viendo la tyerra ke le estava vinyendo enriva, lo estava echando, i dospues se estava suvyendo enriva de la tyerra. I este modo parvino a salir del pozo.
La leson de esta istorya: La vida syempre mos va kitar problemes, la vida no es fasil, ma si kreyemos, i si keremos, i si miramos pozitivo, ya puedemos parvinir.
Un abraso grande.
