En el anyo 1942 un diya de invyerno, en un kampo de konsantrasyon, malgrado ke aviya muncho friyo, un mansevo, de los teles de la guerta, ve pasar una ija chika de edad i muy savroza. La manseva lo ve mezmo al soldado, tanto se emosyona le echa una mansana para amostrarle sus sentimyentos. En akel estado, para uno ke esta syervo en este kampo ver una ija, sovretodo una ija ke le echa una mansana es muy emportante para el. Esta mansana i esta sonriza es vida, es amor, es esperansa, es una luz ke alelumbra su oskuridad.
Al otro dia, mezmo ke era una lokura de pensar ke va vinir i va pasar de muevo, la ve a la ijika ermoza ke vino kon una mansana, malgrado la inyeve i el friyo, la mansevika vino i kuando lo vido al soldado le echo una mansana. El korason del soldado palpito diya entero.
Esto kontinuo unos kuantos diyas. Esta shena lo ke sureyava dos puntos ma para eyos era una koza muy ermoza.
Un dia en echandole la mansana el soldado kon una boz muy triste le dize a la mansevika:“amanyana no vengas i no me traygas mansana porke no va estar aki, esta noche me estan mandando a otro kampo”.
I se alesha kon las lagrimas en los ojos.
Dospues de la espartisyon, en sus momentos de dolor, pensava a la ija ermoza ke le echava mansana, sus ojos viya akeos ojos ermozos, akeas palavras dulses, su pureza i sus miradas timidas. Entremyentes peryo a toda su famiya en esta maldicha gerra.
Al mansevo lo ke le kedo era un ermozo rekuerdo i una chika esperansa de verla de muevo.
En el anyo 1957 en los Estados Unidos, dos emigrantes adultos se konosen achakes de otros amigos. Una de las dammas le demanda a un emigrante:
“De ande vinites, ande estavas el tyempo la gerra jeneral”?
El ombre le responde:
“Vine de Almanya, estava en un kampo de konsantrasyon”.
La damma kontinua:
“I yo vine de Almanya, me akodro komo si fuera oy, en pasando por un kampo viya un mansevo i kada diya le yevava una mansana i se la echava por los teles. Dospues el se fue a otro kampo ma yo nunka me olvidi de el i syempre lo kije byen, lo kije muncho byen”.
El ombre le demanda:
“Es ke un diya este mansevo te disho, “mas no me traygas mansana porke me van a mandar a otro kampo”?
La damma shasheada le demanda:
“Si, tu esto dande lo saves”?
“Lo se muy byen, porke akel mansevo era yo, anyos bivi kon tu imajen i kon esta esperansa ke un diya te va topar i te va dizir, te kazas kon mi”?
En 1996 en el diya de San Valentin, esta damma, en un program de OPRAH WINFREY talk Show de televizyon, konto esta istorya i deklaro de muevo su amor por su marido de 40 anyos, delantre de miliones de personas.
