El grupo ke viyajamos endjuntos, BTS, la primera vez empesimos en los anyos 1996 kon el viyaje a Londra. Kuando la konosi esta sivdad, me namori. Tiene kayes ermozas, plasas i parkos grandes, teatros ande djuga muzikales, muzeos, pubes muy sempatikos i kayentes. La sivdad es un poko kara, ma ya vale por ver estos ermozuras. Si keresh vos eskrivere los lugares ke kaminimos. Mos fuimos kon British Airways i arivimos al aeroporto Heathrow. El Hotel St. Giles estava en la kaye Totthenam Court Road, ke es muy serka de Oxford Street. Es una kaye muy larga i grande ande ay munchas botikas komo, Marks & Spencer, Selfridges ets. Alkavo de este kaye se topa la guerta grande ke se yama Hyde Park i Marble Arch ke es monumento de viktorya. El otobus de los turistos ke es Hop on Hop off se alevanta de aki. Las kalejas New Band kon Regent Street pasan de en medyo del Oxford Street. La plasa Piccadilly Circus kon Trafalgar Square se puede ver en kaminando o si no kon el metro. Vos konsejo de deskuvrir la sivdad en kaminando. El parlamento Westminster i la ora ke es el sembol de Londra, Big Ben son lado kon lado. Tower Bridge es en medyo del rio Thames. En el bodre del rio se topa la muraya istorika Tower of London. El sentro Covent Garden es un lugar ermozo para kaminar i ver. El palasyo Buckingham, la katedral St. Paul, los muzeos British Museum i Madame Tussauds tambien la galeriya de arte National Art Gallery es emportante para los turistos. La sinagoga se topa en la kaye New Cavendish Street, se nombra Central Synagogue. Si vinimos al sujeto de las supas, un diya kuando estavamos komyendo en un English pub kijimos la spesyal de los Inglezes, Fish & Chips i unos amigos kijyeron bever supa ke el garson rekomendo, Cullen Sking. Me vino muy enteresante, le demandi i me konto komo se apareja.
Materyales
4 Kupas de agua de Leche yagli
1 oja de Aurel
½ Kilo de Peshkado Mezgit
2 kucharas de supa de manteka sin sal
1 sevoya seka
400 gr de patatas kortadas en kubos
1/2 Kupa de agua de Krema
Sal i pimyenta preta
Para Garnitur sevoya de frenk
Aparejar
Aryento de una kaldera la leche kon el oja de Dafne se buye. Ensima se mete el pishkado i se aspera fin ke se kozga. Despues ke se kozyo el pishkado, se kita de la kaldera kon el Dafne kon un kuchara ensima de un tovaja de papel. La leche ke estava en la kaldera se mete aryento de un chini ondo. Despues ke se lavo la kaldera mete aryento la manteka i la sevoya seka, empesa a karishtereyar fin ke se aze la kolor ruvya. Depues se mete la leche de muevo kon las las patatas i se koze fin ke se ablanda. Asperando ke se kozga kale karishtereyar porke la leche se korta. Kon una kuchara se azen las patatas pure. Despues se mete ensima el pishkado ke esta asperando en el chini i ensima la krema. La sal kon la pimyenta preta se adjustan. En azyendo el servisyo se mete la sevoya freska ensima si vos plaze kon un poko pimyenta kolorada pikante. Kon el pan de mais es muy savrozo.
