Si keres fuirte del bruido de la sivdad, suvete a un vaporiko de Bostancı i dirijate a una de las izlas de Estambol. Te rekomendo ir a Büyükada. En abashando del vapor, el umo i el bruido de la sivdad disparesen. El parfum de las rozas i el aire fresko de la izla te enborrachan. Tomar un te en el kafiko al bodre de mar i ver la djente korriendo para alkansar los vapores es un grande plazer.
Kuando no esto okupada, me merko pipitas del vendedor de enfrente i piedro la nosion del tiempo. En saliendo de la eskala, suviendo por la chika rampa, yegas a la famoza torre de ora de la izla. Aki es el punto de enkontro de todos. Anyos antes, alrededor de las siete de la tarde, mujeres elegantamente vistidas viniyan a la eskala para resivir sus maridos ke abashavan del vapor.
Si suves por la chika rampa, la kaye ke se ekstende a la derecha, te yeva a la Avenida Nizam. En kontemplando las villas antikas, te sientes transportada al pasado. Ken save kuantas personas famozas bivieron en estas villas. Intelektuales, eskritores, personajes emportantes del Imperio Otomano; kada uno de eyos tiene su propria istoria. Dizen ke el revolusionario judío sovietiko, Leon Trotsky bivio en una de estas villas durante su egzilo en Büyükada.
Duspues ke suvites la rampa, si tornas a la siedra, yegas al merkado de la izla. Aparte de los super marketes, puedes topar magazenes ke venden merkansias para azer regalos. A la fin del merkado, yegas al bodre de mar, ke se yama Kumsal. Vale la pena de ver las villas a lo largo del bodre de mar, plajes para nadar, bankos i chikos restoranes en el estilo de taverna. A la fin de la plaj, vienes al Klub de Spores Akuatikos. Los shabates i alhades la noche, komer i baylar al ritmo de la muzika de la banda en la guerta del klub es uno de los pasatiempos favoritos de la izla.
La rampa ke suve del klub ariva te yeva al Maden, la segunda avenida la mas grande de la izla. Si kaminas a lo largo de esta avenida, yegas a la sinagoga Hesed Le Avraam. La sinagoga esta avierta las noches de viernes i las demanyanas de Shabat. Fin el anyo 1903, las orasiones se selebravan en una kaza alkilada por la komunidad. Avraam Franko, un riko komersante, dio un terreno de su propiedad a muestra komunidad i konstruyeron una sinagoga aya.
A la derecha de la Avenida Maden se ekstende villas kon guertas adornadas de ermozas rozas i una variedad de arvoles. A lo largo de esta avenida, yegas a la Asosiasion Yıldırım ke es una asosiasion de muestra komunidad. Yıldırım ofre todo modo de oportunidad a las kreaturas i los adultos durante el enverano.
A la fin de la Avenida Maden, yegas a Luna Park. No es el Luna Park orijinal. Es un restoran kon una vista manyifika. Si keres, puedes suvir a la kolina Aya Yorgi. De aya puedes kontemplar las vistas de todas las izlas.
El Klub Anadolu es el klub el mas ermozo i el mas luksuozo de la izla. El klub fue konstruido por Atatürk anyos antes. Los miembros profitan de una variedad de aktividades. Atatürk kada vez ke viniya a Estambol se kedava en el otel del klub. Kuando Atatürk abashava a la eskala, la djente korriyan para verlo.
