Si kaminatesh la Evropa i estash bushkando lugar muevo para ir vos rekomendo ke Marroco. Es una kultura muy diferente. Los Berberes kon los Arabos biven endjuntos. El dizyerto de Sahara i tambiyen las montanyas Atlas se topan aki. Es un paiz chiko, ma las sivdades son muy diferentes. Por egzempyo, Kazablanka kon Marakesh. Kada una tiene otra savor. Kuando kaminash en las kayes, di ke estash en un plato de filmo. Los ombres kon entaris i fes, las mujeres kon entaris largas i las karas tapadas. Al lado de esto, las fraguas muy modernas lado kon lado kon las kazas otantikas. Lss minares de las meshkitas son diferentes. No paresen a las de Estanbol. Kuando mos fuimos a Marroco, en primero mos yevaron al muzeo de los Djudyos, un muzeo muy chiko. En kaminando estash konosiendo la kultura de los Djudyos de Marroco. La meshkita Hasan II, es la mas grande meshkita de Marroco i por siguro la sigunda del mundo despues de la meshkita Saudiya. El bodre de la mar se yama The Corniche, un lugar muy otantiko. Aryento de este kamino se topa la mozole del Sidi Abdel Rahman. La djent i las kazas estavan un poko de espantar. El tur mos yevo a la sivdad vyeja Medina. De aki vinimos a la plasa Mohammed V. En el administrasyon se topa el rey VI Muhammed, ke el puevlo kere muncho. Tambiyen i al padre lo keriyan. Vos akodrash del filmo KAZABLANKA, ke djugaron Humphrey Bogart i Ingrid Bergman. En un shena aviya un pianisto en un klub yamado, Rick’s Cafe. Mos yevaron ayi para verlo. Antes de salir de Kazablanka mos fuimos al bazar. Me plaze muncho ver i kaminar los bazares de las sivdades i ver ke komen ke beven, komo merkan ets.
El sigundo diya pasimos de Kazablanka a Marakesh. Esta sivdad estava mas ermoza i otantika. En kaminando mos yevaron a la meshkita Kutubiye, a la Guerta de Majorel, la plasa de Jemaa el-Fnaa, ke es otro mundo. Aki en kaminando vesh i bivish la vida de los Marokanos. Di ke parese un sirko avyerto.
Un diya en komyendo en un restorante, vide ke enkomendaron supa. Le demandi al garson ke es esta supa. Me disho se yama Harira. Aki se beve espesyalmente en Ramadan. Tambiyen los Djudyos en Kipur por kortadura beven esta supa.
Materyales
1 kupa de chay de garvansos
1 kupa de agua de lentejas vedres
1 findjan de kafe de arroz krudo
4 domates grandes
Ojikas de apyo
100 gr karne kon el gueso
1 findjan de azete de oliva
1 punyado de prishil
1 punyado de kishnish fresko
1 kuchara de dulse de kimyon
1 kuchara de dulse de turmerik
1 kuchara de dulse jenjibre
1 kuchara de dulse de pimyenta kolorada
1 kuchara de dulse de pimyenta preta
1 kuchara de supa de salsa de domat
2 kucharas de supa de arina
1 guevo
2 kucharas de supa de fideyos
sal
Aparejar
Los garvansos se meten en agua de la noche. Despues se kita el kuero i se parte en dos i se echa a la kaldera. Las lentejas, la domat rayada, las zarzavates ke se aparejaron en pedasos chikos, la salsa, las espesyas i la azete se mete kon 2 litros de agua. Se koze 30-40 minutos. Despues ke se kozyo, se echan los fideyos kon la arina ke se avre kon un poko de agua i se karishtereya presto presto. En el guevo ke se karistereyo en otro chini se mete aryento avagar avagar. Despues de 5 minutos ya esta pronta la supa. Se kome kon pita al lado.
