Helena partisipo a una demonstrasion muzikal de un grupo de prizonieros. Franz Wunsch, uno de los miembros de los SS, la remarko. Kuando Helena eskapo de kantar, Wunsch se aserko i le disho: "Te rogo, kanta la kantika otra vez". Helena lo miro kon lagrimas en los ojos i disho de si par a si: "Estos son los ojos de un asesino? Estos son los ojos de un umano!". Wunsch se namoro de Helena i empeso a vijitarla kada dia en su kamara. Se estava komportando amable i protektor. Le estava yevando vistimyentas i le estava dando sus rasiones de komida. Kuando Helena se izo tifus, la estuvo guadrando, i la estuvo mirando finke se izo buena.
Estava echando tino ke Helena seyga bien alimentada i le estuvo dando las komidas ke su madre le estava embiyando. Wunsch estava ayudando a salvar las vidas de las prizonieras ke estavan en la mezma kamara kon Helena, en rizkando su propia vida kon sus superiores en las SS. A vezes le pasava notas ke dezían "Me namori de ti".
Helena se estava diziendo: "Prefero estar muerta ke tener relasion kon un ombre de los SS". Ma kon tiempo, Helena empeso a sintir afeksion por Wunsch. Un diya la ermana de Helena fue transportada al krematorio kon su ija de mueve anyos i su ijo muevo nasido. Helena korrio al krematorio. Un amigo le dio haber a Wunsch, ke arivo djusto kuando Josef Mengele, el mediko de los SS konosido komo "El Anjelo de la Muerte", estava desidando kual de los prizioneros va bivir i kual se va murir. Kuando Wunsch arivo al krematorio, empeso a aharvar Helena. Entremientes, le demando en sekreto: "Dime presto el nombre de tu ermana antes ke seyga muy tadre". Helena respondio: "No puedes. Vino kon dos ijos chikos". Wunsch le disho: "Ijos, esto es diferente. Los ijos no pueden bivir aki". Presto duspues, korio al krematorio para bushkar a Róžika, la ermana de Helena. Wunsch pudo salvar a Róžika diziendo ke lavorava por el en el mahzen, ma no pudo azer nada por sus ijos. Fueron asasinados en la kamara de gaz.
La romansa entre Helena i Wunsch kontinuo en sekreto. Una vez, Helena fue enterojada en una okazion sovre su relasion. Helena inyego su relasion. Ya saviya ke si su relasion saliya en medio, i los dos ivan a ser asasinados. "Uvo momentos ke me olvidava ke era judia i el no era judio. A la fin, me namori de el. No puediya ser realista" disho Helena mas tadre. La romansa kontinuo fin la evakuasion de Auschwitz. El 27 de Enero de 1945, la armada sovietika entro a Auschwitz, Birkenau i Monowitz i libero siete mil prizonieros. La majorita de los prizonieros estavan hazinos i serka muertos. Una de las prizonieras era Helena Citronova.
Wunsch la bushko a Helena durante anyos. Helena no respondio a sus letras. Wunsch se kazo en Austria. Helena se kazo en Israel. En 1972, Franz Wunsch, fue djuzgado. Un dia Helena resivio una letra de la mujer de Wunsch demandando ke venga a estar shaet en favor de Wunsch. Helena viajo a Viena porke konsiderava su dover de ser shaet en favor de Wunsch. En el tribunal, Helena avlo sin emosion i sin mirarlo. Les konto todas las buenas aksiones de Wunsch. Kuando eskapo de avlar, Wunsch disho ke no mato a dingunos. A la fin, el djuzgador desido al deskulpamiento de Wunsch.
