Antes me iva a la Almanya unas kuantos vezes al anyo porke aviya feria. Mos ivamos a Frankfurt i a Münih. En Almanya no se aze munchos tures turistikos. Kada vez penso deke no se aze tures, komo Paris, Roma, Amsterdam o Barcelona. En Almanya deve de aver kozas komo natura i istoria. Por egzempyo, puedesh topar munchos kozas de la sigunda gerra mondial. En las montanyas la vista es maraviyoza. En estos diyas se izo moda los tures de Rios ke se azen kon vapor. Se esta azyendo en los rios ke se topan en Almanya, komo Ren, Danube ets.
Dizeremos ke vos fuitesh a Frankfurt, el mas emportante lugar de kaminar es la kaye ke es serrada al trafiko, Zeil. Aki se topa botikas, kafes, i restorantes. Es una kaye muy turistika i aktiva. Römer, es un distrito antiguo. Aki se topa una plasa i en el dorredor kazas ke son agora aryento restorantes. Es muy otantiko. Mas de esto puedesh kaminar, en Frankfurt, Alte Oper, la kaza del eskrivano Göethe, Göethe House, la Katedral de Frankfurt, el bazar Kleinmarkthalle, la guerta de los animales. Saksenhausen, es una maalle ande se topa Restorantes, Kafes i Diskotekas. Los mansevos se arrekojen aki mas muncho las noches. El Rio Main ke pasa den medyo de la sivdad da vida a esta sivdad.
Kuando me vo a Münih la istasyon de trenos Hauptbahnhof es el mas aktivo sentro de la sivdad. Para ver i kaminar la sivdad, el otobus de los turistos ke son Hop-on Hop-Off es muy ideal. En kaminando vesh la Iglesiya i la meyana ande se beve bira, ke se fraguo la primera vez en la sivdad, el parko olimpiko ande se izo las Olimpiyadas, la fabrika de arabas BMW, el stadyum Allianz Arena, el palasyo ande biviyan la famiya del reynado, la guerta botanika i la kaye ande bivyo Hitler. Despues del tur me fui a la Sinagoga ke se topa en St. Jakobs Platz 18. El bazar Viktuarien Market es ermozo.
Un diya en Frankfurt me fui a Römer para komer. La djente estava komyendo komidas diferentes. En la meza de al lado kijyeron una komida. Kuando vino, kuriozo, le demandi al garson kualo es i me disho ke es supa de kezo ke es spesyal de los Almanes.
Materyales
3 kucharas de supa de manteka
3 dyentes de ajo
3 kucharas de supa de arina
1 kupa de agua de kezo krema
1 kupa de agua de krema
1/2 kuchara de chay muskat rayado
4 kupas de agua
Sal i pimyenta
En azyendo servis se mete ensima de la supa sevoya freska kortada delgado
Aparejar
Aryento de la manteka, la arina i el ajo se sofriyen. Kuando se aze la kolor roz se mete ensima la agua i el espesyas. 15 minutos se karishtereya i se mete aryento el kezo i la krema i se karishtereya fin ke se aze lizo. Despues se mete en bol i ensima kon la sevoya freska ke se korto delgado. Si vos gusta, puedesh meter al lado una revanada de pan senteno.
