Un ombre ya estava enfasyado de ir a lavorar todos los diyas, mientras ke su mujer se kadava en kaza todo el diya. Se penso ke esto no era djusto del todo. Si solamente su mujer sintiera una vez lo ke era salir i lavorar, para ke entendiera lo ke se esta pasando en su terible lavor.
La noche antes de echarse arogo al Dio: O mi Dio Todo Poderozo, te rogo aze un miraklo ke mi mujer i yo puedamos trokar los rolos, ke seya al menos por un solo diya. Para ke eya pueda bivir lo ke yo bivo kada diya, i yo para ke pueda kedarme en kaza en su lugar i pasar todo el diya kon repozo.
Kon esta orasyon, el ombre se durmio. El Dio ke es piyadozo, desido de realizar este dezeo. La demanyana, en lo ke se esperto el ombre, se enkontro kon el puerpo de su mujer, mientras ke eya se esperto kon el puerpo de su marido.
El ombre se alevanto, aparejo el dezayuno, esperto a los ijikos, les aparejo sandviches para la eskola, les dyo a komer por la demanyanika, los yevo a la eskola, torno a kaza, arekojo la ropa suzya de todas las kamaretas, las metyo a la makina de lavar i la metyo a lavorar. Despues se fue a la banka a tomar paras para pagar las fakturas del telefon i elektrisita. De aya se fue al bazar a merkar lo menester para la komida de la noche. Torno a kaza, metyo todo lo ke merko a su lugar. Se fue al banyo, kito la ropa lavada de la makina i la metyo al sekador. Alimpyo la kasha de arena del gato, lavo al perro. Se fue a las kamaretas, izo las kamas, barrio la kaza entera, espondjo la kuzina. Alimpyo el banyo, dublo la ropa ke se aviya sekado i los metyo a sus lugares. Presto presto se fue a la eskola a tomar los ijikos en tiempo i yevarlos a kaza.
Kuando vinieron a kaza ayudo a los ijikos a azer sus lesones. Entretiempo ampeso a dar uti lo ke aviya de menester. Despues ampeso a mundar las patatas, lavo las salatas, alimpyo el poyo, le metyo la salsa ensima i lo metyo al orno. Aparejo la meza i kuando vino el marido se asentaron i komieron. En lo ke eskapo la komida arekojo los platos i los lavo. Yevo a los ijikos a la dush, los echo a sus kamas i les konto konsejikas asta ke se durman.
A las diez de la noche ya estava tan kansada ke asigun se entro a la dush se echo a la kama. Esto malorozamente no era la fin de su diya porke teniyan de azer el amor.
A la demanyana kuando se esperto i se enkontro de muevo en el puerpo de su mujer, imediatamente ampeso a arogar al Dio: Dio miyo, ayudame! No saviya ke mi mujer teniya tanta difikulta en su diya. Por favor, trokamos de muevo.
Vino la repuesta de los sielos: Ijo, me alegro ke tomates tu leson. Ma tienes de asperar otros mueve mezes para el trokamiento, porke anoche kedates prenyada!
