Unas kuantas teorias egziste sovre el teatro de sombras. Unos dizen ke Yavuz Sultan Selim trusho artistas del Ejipto a Estambol. Sovre otros investigadores, los judios ke emigraron de Espanya al Imperio Otomano trusheron el teatro de sombras a Estanbol. Otros dizen ke los zinganos ke emigraron de la India al Oksidente, lo trusheron.
Uno de los personajes emportantes de Karagöz es el tipo judyo. Rankontramos al judyo en 39 ovras de Karagöz. El judyo, lo mas, se yama Salamon, Moiz u Mishon. En la ovra "Barka kontra Barka", el barkero Karagöz le demanda una lira del judyo. El judyo empesa a tratar i le dize "dos de sinkuenta groshes ya te abasta". Karagöz no aksepta. Esta vez el judyo dize "te dare kuatro de ventisinko groshes". Karagöz de muevo no aksepta ma duspues se mete a kalkular i ve ke kuatro ventisinko groshes azen una lira. En munchas ovras, el judyo se burla de Karagöz i de su pureza.
En Karagöz, kada tipo entra a la shena kantando su kantika. El judyo tiene tres kantikas. La primera es "Balat kapusundan yirdim içeri" (De la puerta de Balat entri ariento). La segunda es una kantika folklorika, “Altın tasta gül kuruttum” (Seki la roza en el tas de oro) i la tresera kantika es en judeoespanyol, “Anda la vizo”. Las kantikas las dizen en una forma de meskla, en judeoespanyol, grego i turko para azerlas mas komikas: “Ande vamos el de aki, / Yo kero por aki, / Kaminamos el Balata, / Djumbush kon salata.../ Ande ande ande? “Yel Balat’a”.
Los judyos turkos partisipavan kon sus profesiones. En las ovras de Karagöz, puediyash ver komo bivían los judyos turkos de la epoka. En estas ovras, el judyo era sarraf, eskidji o komersante. En el pasado, los judyos turkos lavoravan prinsipalmente komo eskidjis, ma kon tiempo, empesaron a lavorar komo komersantes i sarrafes, i empesaron a ganar paras. En las ovras de Karagöz, los judyos turkos trayen sus kultura, del momento ke entran a la shena.
En siertas ovras, alado de sus profesion, tambien se mensiona el lugar ande mora. La komunidad judia de Estanbol moravan prensipalmente en los distriktos de Balat i Hasköy, i una de las kayes ke konektan el Kuerno de Oro kon el distrikto de Balat se yama "Balat Kapusu". En las ovras del Karagöz, el personaje judyo se komporta de una manera ke reflekta las karakterístikas típikas de los judios: prudente, meoyudo, ruidozo, eskaso i diskutidor. El judio nunka puede prononsar korektamente el nombre de Karagöz. Lo yama Karauyuz o Kara de Kuervo.
La ovra en la kuala los judyos turkos tienen buen karar da partisipasion es la ovra "Salıncak" (Kuna). En esta ovra, Karagöz ke es kunadero, aze kaer a un judio ke se esta aserkando de la kuna, entremientes el judio esta tratando. El judio no se esta meneyando de ande kayo. A Karagöz le parese ke el judio se muryo. Hacivat ke se esta aserkando de la kuna, ve ke el judio esta imobil. Se va a la komunita judiya i los enforma de la situasyon. Un poko duspues, el rabino i un grupo de judios vienen para azer los funerayes del Judyo. Empesan a dizir una orasion. Vyendo ke la orasyon es falsa, Hacivat entiende ke el judio no se muryo. Kuando Karagöz se apersive de esto, se aserka de la kuna keshandose. El judio se alevanta i abandona la shena en medio de las keshas de Karagöz.
