VAN es una sivdad fondada en un terreno sinko kilometros al este del Lago Van, en la parte konkava montanyoza i volkanika de la rejyon de la Anatolia Oriental. La altitud es 1735 metros. El lago Van es el lago el mas grande de la Turkiya i se topa en medyo de altas montanyas. Es el tyerso de la mar Marmara.
Van es la dizimuevena sivdad la mas povlada de Turkiya.
1.100.000 personas biven en Van, ke tyene 13 distriktos komo Başkale, Çaldıran, Muradiye i otros. Es una de las sivdades mas ermozas de Turkiya, okupa una pozisyon emportante en la istorya, en la naturaleza i en turizmo kultural. Es una de las sivdades mas antiguas del mundo.
El simbolo de Van son los gatos ke tyenen los ojos de diferentes kolores. Un ojo blu, el otro vedre.
“El Kastillo de Van”, es una struktura istorika ke tyene las trasas de las sivilizasyones Urartianas.
La izla de AKDAMAR, es una izla en el lago de Van. La Kaskada Muradiye es mas o menos a 80 kilometros mas leshos del sentro de Van, es konveniente para el transporto. Los vijitadores se pueden ir aya kon el transporte publiko. Esta kaskada en enverano kuando esta muy kayente, tyene un aver ke aresfreska la persona, se puede azer piknik.
Es un lugar ideal para azer munchos spores de naturaleza. En invyerno se konjela totalmente, es un lugar para pueder fotografiar i egzaminar el maraviyozo fenomeno natural.
El Lago de Van, es el simbolo de la sivdad, tambyen tyene el titolo de la fuente de soda la mas grande del mundo. Aryento ay 139 tipos de peshkados.
La Izla de Akdamar es una izla muy konosida i renomada de Van. En medya ora kon barkas de mar se puede arrivar a esta izla. Se puede entrar a la mar aki. Se puede vijitar la eglisya, i se puede eksperimentar un viaje istoriko.
En esta izla ay un muzeo komemorativo ke se puede vijitar. En el muzeo Akdamar, ande se enkontra relieves ke sovrebivyeron intaktos de los tyempos pasados asta muestros dias.
En el envanter del Muzeo de Van se topa 45.000 ovras. Solamente 2.550 ovras estan en egzibision. Este muzeo es muy konosido i riko a kavza de las ovras Urartianas. Van es una sivdad ke izo ospitalidad a munchas sivilizasyones diferentes. VAN es una de las sivdades mas ermozas de la rejyon de la Anatolia Oriental, espera a sus vijitantes kon su kultura profonda i su djente ospitalyera.
Fue un viaje de tres dias muy intenso, yeno de kultura i muy agradavle.
