Vos puedo dizir ke kaminimos la Evropa entera. Del Norte al Sud, del Oriente fin al oksidente. Pensimos ke solo a Portugal no mos fuimos dainda. Izimos program para ir a Porto i a Lisbon. Al tur de Portugal empesimos de Porto. En dos diyas vos kontare ande kaminimos. Empesimos del kyupri de Dom Luis I. Despues el Palasiyo del Buorsa i la katedral de Porto, de aki vinimos a la estasyon de los trenos ke se yama Soo Bento. Los seramikes de la pared era koza de ver. De aki pasimos al distrito de Ribera ande se topa el rio ke se yama Douro. Despues de midi mos fuimos a la Sinagoga de Porto ke se yama Mekor Hayim. A la noche en kaminando vinimos al sentro de la sivdad ke se yama Santa Caterina. La kaye es serrada al trafiko. Ay botikas, kafes, restorantes. Dizen ke la autora, J.K. Rowling ekrivyo el livro de Harry Potter en el kafe ke se topa en esta kaye, Majestik Kafe. El librero, Lello di ke parese a un muzeo, i entrar aryento es kon paras. Despues ke kaminimos este kaye, mos fuimos al bazar ke se yama Balhao Market. Aryento de este bazar se vende karnes, pishkados, kozas de sharkuteriyas, si keresh puedesh tomar un vaziko de vino i puedesh komer diferentes tapas en pyes. Sigundo diya empesimos al tur de Braga. La guerta de la katedral paso delantre de la Iglesiya Bom Jesus de Monte. Una vista lokura. Despues mos fuimos a Guimaraes, una sivdad aryento de una muraya muy antigua. Despues a Aviero. Di ke era Venezia. Las barkas kolores i kolores, izimos un tur kon las barkas, estava muy ermozo. Si demandash en kaminando kualo komitesh i bevitesh, primera koza es la spesyalite de Portugal, Pastel de Nata. Es un kek ke se puede aparejar dulse i tambiyen kon kezo i zarzavates. En vezes se yama La turta de Belem. En un restorante komimos Tapas de Sardela i el pishkado spesyal ke es Bacalao. Siguramente i un vaziko de vino de Porto. Al lado de la meza ke estavamos asentados vino una supa i kon kuriozidad le demandi al garson ke es esta supa, me disho se yama Caldo Verde. I me dyo la resefta.
Materyales
4 Patatas grandes
1 Sevoya grande
2 dientes de ajo
4 kucharas de supa de azete de oliva
200 gr Kol preta o si no Pazi
2-3 revanadas de chorizo, ke es komo sudjuk
1 lt de kaldo de karne
Sal i pimyenta
Aparejar
Las patatas se kortan en kuatro i se eskaldan aryento de una kaldera kon el kaldo de karne. De otra parte las sevoyas kon los ajos se sofriyen un poko i se echan aryento de la kaldera. Se kozen fin ke se ablandan las patatas. Despues ke se kozyo, se echan aryento del Blender fin ke se aze lizo i se karishtireya. Aryento de este supa se echan las koles pretas ke se kortaron komo sherites delgados i se koze 10 minutos. Antes de azer servis se echa un poko de azete al chini i ensima de la supa se mete los chorizos (sudjuk) i al lado se mete el pan de maiz.
