Rabi Yohanan Ben Zohay es uno de los savyos del Judaizmo ke supo mantener el Judaizmo en ora de apreto. Elevo del Rabi Hilel Azaken, i mizmo ke no fue nasido de esta famiya, el kon su dinamizmo i su atamyento a su puevlo fue su verdadero apoyo para su puevlo, i al Judaizmo de toda manera pozitiva. En la epoka de la revolta Romana, Yohanan Ben Zohay se dyo la misyon de luchar kontra los Romanos para la viktorya, en la epoka del sigundo Bet Amigdash. La situasion paresiya perdida; Yerushalayim estava en la ambyertura i kon una epidemiya ke estava aziendo desapareser chikos i grandes. Ben Zohay estava vyendo ke el Judaizmo se esta peryendo, ampeso a bushkar muevos planos para salvar su puevlo.Yohanan Ben Zohay arekojo sus disiplos para diskutir komo salvar Yerushalayim i sus moradores. El Jeneral de los Romanos era Vespasian i kaliya absolutamente entrar en komunikasion kon el, i pueder arivar a un akordo. I por esto kaliya un plano para pueder salir de Yerushalayim, donde todas las entradas i salidas eran defendidas. Los disiplos de Yohanan Ben Zohay lo metyeron en una tomba burakada por todas las vandas, i arivando kon yoros, “El Rabi se muryo; estamos guerfanos, ke malor; la grande epidemiya tomo muestro Rabi kerido”. Los gardianos ke se espantavan de la epidemiya avyeron las puertas i desharon pasar la tomba, i presto Ben Zohay arivo al lado de Vespasian. El jeneral vido salir de la tomba uno vistido komo un Rabi ke le diziya “Glorya a ti Grande Emperador de Roma, te saludo kon respekto.” I Vespasian le respondyo, yo no so el Rey de este grande imperyo, i kijo echarlo de delantre de el. Ben Zohay topo palavras de glorya para ke Vespasian responda favorablamente a su demanda de alevantar el siejo de Yerushalayim i le predicho ke va ser el imperador de Roma. En viendo ke va parvinir a akseptar le demando YAVNE (Vigna) teritoryo ande se ira a bivir, i ke sera el sentro spiritual Judaika. La Tora, la kultura, las tradisiones fueron mantenidas grasias al sentro de YAVNE i sovre todo a los esforsos de Rabi Yohanan Ben Zohay.
Durante 2000 anyos del Galut de Roma, dingunas de las komunidades del mundo peryeron sus atamyentos entre eyas. Pogromes, enkizisyones i todo modo de apreto no pudo espartir los Judyos de la Tora ni de la kultura Judiya. YAVNE fue la razon de kontinuar muestra kultura Judiya i muestra egzistensya fasta oy.
