El otro diya una amiga ke vino a verme me trusho una papelerika de muezes i no entendyo deke me meti a riyir kon lagrimas en los ojos. Delantre su enkanto le ampesi a kontar un rekuerdo del pasado.
Era un enverano i mozos muevos kazados, estavamos dainda morando kon mi madre i padre. A la madrugada de este diya sono la puerta kon fuersa. Todos korriendo avrimos la puerta i vimos kon enkanto un empyegado de la posta ke mos esta espandyendo un telegrafo. Kon ansya lo avrimos. Unos kuantos byervos. "Estamos en Yalova, vos aspero. Papa Filiba". Papa Filiba ke dezeyó ke vayamos a verlo. No se puede dizir “No” . Presto vistir, aparejar una validjika ande mi madre adjusto un fostan blanko de “Regalo” ke pensando ke siguro ke en el otel kale estar muy shik. Era un fostan ke no se aviya estrenado, kurto mos echimos de la eskalera abasho. Ya se topava taksi en akeyos diyas. La eskala del vapor de Prenkipo para ir tranzit a Yalova. I fue de mozotros el enkanto de ver el ermano grande de mi marido kon su mujer ke i el aresivyo telegrafo ke diziya la mizma koza ke a mozotros. Mos ofresyeron muezes ke estavan komyendo, ke resivimos kon plazer salyendo ambyertos de kaza. De Prenkipo tomimos vapor para Yalova kon trez muezes en el estomago. Ke ermozo paseyo, riyendo burlando i mos fuimos pishin al Grand Hotel. Aya mos disheron kon muncha seryozita ke no ay denguna kamareta a este nombre i visto ke es fyesta estan todas tomadas de antes. En esto se aserko un empyegado ke mos estava oyendo, ke un ombre aedado de este nombre desho un mesaje para mozotros ke estan en el Köy de Yalova. Para no peryer tyempo, ambyertos i kansados, mos metimos a la bushkedad de araba i mos fuimos al paso de los kavayos al lugar “tan ermozo”. En el köy, topimos grasyas al Dyo a mi eshuegro ke mos aresivyo kon bezos i amistad, mos disho ke alkilo la kaza entera de kuatro kamaretas, visto ke la ermana grande vino kon su marido i las dos kriyaturas. Bendicho el Dyo ya estamos la famiya en kompleto. Kuando demandimos las yaves de las otras kamaretas de este “Palasyo”, el patron mos dize kon su kara de mintirozo ke el alkilo solo una kamareta! Ya se eskuresyo el tyempo, un ayaziko fresko ampeso a soplar. Entrimos a la unika kamareta, mos kitimos los kalsados i mos asentimos enriva de los divanes uno kontra el otro, i muy orozos, sovre todo kuando Papa Filiba komo lo yavamamos, mos espande una papelera yena de muezes freskas ke ampesimos a romper kon una piedra i a komerlas kon muncho gusto.
Nunka no me olvidi de esta nochada ke pasimos a riyir, a kontar, de vez en kuando a durmir de kanserya i de vez en kuando de komer muezes…
A la demanyana topimos kon ambyertura mas duro ke el taanit, una supa enshaguada, guevos medyos haminados… Kuando vemos espuntar mi madre i mi padre kon dos chantas yenas de lo bueno del mundo, sin mizmo saludarlos, mos echimos enriva las chantas, presto komyendo kon las manos, las dolmas, las fritadas, la salad russe, arovando los börekes i komyendo sin mizmo respirar. Lo mas ermozo fue kuando mi padre disho ke trusho una papelera de muez… Los gritos ke echimos se puediyan oyir de la Büyükada.
Todos endjuntos tornimos a kaza a Stanbol. Kuando avri la validja, vide kon enkanto el fostan blanko de “Regalo” se izo vedre, siendo ke el bokal de kolonya ke aviyamos metido aryentro la validja se vazyo i su kolor vedre boyadeyo todo, sovre todo el fostan famozo ke se echo al chop, visto ke no valiya ni para prostela.
Al otro diya mos echimos todos kon dolor de estomago i kayentura. Esta konseja es syen por syen verdadera, i kuando me akodro es komo una ora dulse i amarga de mi vida, syendo ke todos estos keridos ya desparesyeron i yo so la sola ke kedi para kontar este rekuerdo de muezes, ke no komi mas de mi vida!
