Otruna oja preta en la istorya de los Djudios ke afito en el mez de Junyo…
El mez de Junyo del anyo 1240 de muestra era no era una buena epoka para los Djudios de la Evropa. Los problemes empesaron kon un apostato (uno o una ke se konvirtyo del Djudaizmo al Kristianizmo), un Djudio ke se yamava Nicolas Donin. Al pareser, para demonstrar su lealtad i su kreyensa a la Iglezya i al Kristianizmo, embiyo una letra kon 35 akuzasyones kontra el Talmud, munchas de eyas, detalyos de tekstos ke segun el arebashavan a Yeshu i Mari, kontavan istoryas aparentemente no muy kasher o transmitiyan otros mesajes "ofensivos". Segun el, esto todo se topava en el Talmud. La letra fue embiyada al Papa Gregory IX i se organizo un debate en el ke Donin iva diskutar i provar sus akuzasyones kontra kuatro prominentes rabinos fransezes: el Rabino Yechiel de París, el Rabino Moshe de Coucy, el Rabino Yuda de Melum i el Rabino Samuel, ijo de Salomon de Chateau-Thierry. Los otros myembros kristianos del tribunal eran la reina Blanca de Castilla, el Arbishop Gauthier Le Cornu de Sens, el Bishop Guillermo de Auvergne, el inkuizidor Enrique de Colonia i el rektor de la Universidad de París.
La "Disputa de Paris", komo se konosyo posterioramente, fue una disputa kon un rezultado previsivle. Aunke la reyna garantizo la seguridad de los rabinos para ke pudyeran responder kon libertad, egzistiyan striktas limitasyones sovre lo ke se les permitiya dizir sovre el Kristianizmo i la Iglezya.
El prensipal porte-palavra Djudio, el Rabino Yechiel, respondyo muy byen durante la Disputa kontra las akuzasyones i pudo refutar i reformular las akuzasyones de Donin. Por egzemplo, disho ke, en los puntos referando a Yeshu, se tratava simplemente de dos ombres kon el mizmo nombre, i ke los pasajes ke Donin akuzo el Talmud por dezonorarlo se referavan a un otro ombre yamado Yeshu. Otrun egzemplo, ay un pasaje, sovre alguno ke se yamava Yeshu ke fue embiyado al inferno i ke fue kuvyerto de ekskrementos asta la eternidad. Los Rabinos refutaron esta afirmasyon dizyendo ke el sujeto no era Jesus del Muevo Testamento, afirmando ke “no todo Luis, nasido en Fransya es rey”!
No es sorprenante ke la Disputa se eskapo kon una kondemnasyon del Talmud i otros eskritos relijyozos rabinikos. Se desidyo ke estos tekstos Santos Djudios deviyan ser konfiskados i destruyidos. Dos anyos despues 24 korrosas yenos de livros ebreos, kaji 10.000 livros inkluzo munchos volumes del Talmud, fueron yevados a Paris i kemados, i esto afito en un tyempo antes de las impremeriyas, kuando kada livro se eskriviya a la mano. Tan grande fue la peryita moral i espiritual ke la data de la destruisyon del Talmud se komemoro posteriormente komo diya de ayuno, observado por munchas komunidades Djudias de la Evropa durante el mez ebreo de Sivan.
El akto de kemar el Talmud i otros livros relijyozos despues de la Disputa de Paris tuvo lugar el 17 de Junyo de 1242.
