Estamos pasando de un tiempo ke esta muy difisil malorozamente, no tenemos ni gusto ni plazer. Ansi ke toda la enerjiya, i la gana ke tenemos de bivir, sin kerer, de si para si se esta desparesyendo. Lamentavlemente todos los paizes estan en la mizma situasyon, la djente no esta kontente. Kreo ke vos akodrash, aviya una kantika "Kuando Kayenta el Sol". Kuando empesava a eskuchar la kantika, toda muestra enerjiya se ennaltesiya, porke el sol de si es una enerjiya grande, ma agora mizmo si el sol briya sovre mozotros todos los dias, i si kanta la kantika, no mos kedo gana. Antes a los chikos les demandavamos ke keres ser kuando te azes grande, los ojos briyavan, ken diziya doktor, ken diziya merkader, ken diziya profesor, teniyan una esperansa, agora si les demandash lo mezmo, la repuesta es la mizma, no savemoz. Antes aviya muncha mankura, ma la esperansa, el riyir, i kreyer por la manyana estava syempre prezente, nunka se desparesyo. Ma agora todo ay, ma no estan riyendo las karas, todos estan preokupados. Antes, kazar, merkar una kaza, avrir una botika, eran kozas ke se puedian azer, ma agora todo son solo suenyos, kon la ekonomiya de este tyempo ke es muy difisil. Solo tomar reflo para munchas personas es komo parvenir.
El grande problem es ke la manseves no esta oroza por esta situasyon, i no pueden ver el futuro. I muestros mayores, i mozotros tambien pasimos por difikultades ma agora esta mas difisil por la manseves, la verdad.
La esperansa no es fasil de topar, ma si lo peryes, todo se eskapa. Kreo ke la manseves de oy se va arrebivir de muevo kon la kantika "Kuando Kayenta el Sol" i este kamino de esperansa va kontinuar syempre. No puedes bivir sin suenyo.
El sol syempre ke mos de la enejiya.
